Чарговая пагоня ДАІ за парушальнікам са стральбой здарылася 27 кастрычніка ў Мінску і Мінскім раёне.
27 кастрычніка прыкладна ў 2.00 супрацоўнікамі Дзяржаўтаінспекцыі на вуліцы Ціміразева была заўважана аўтамашына «БМВ», якая рухалася ў напрамку МКАД са значным перавышэннем хуткасці. Міліцыянеры запатрабавалі спыніцца, але кіроўца толькі павялічваў хуткасць. Падчас пагоні парушальнік неаднаразова ствараў аварыйную сітуацыю патрульнаму аўтамабілю, а таксама сваімі дзеяннямі ствараў рэальную пагрозу бяспецы дарожнага руху.
Рухаючыся па аўтадарозе ў напрамку пасёлка Сёмкава, супрацоўнікі ДПС прынялі рашэнне выкарыстаць табельную зброю для спынення «БМВ», у паветра былі зроблены два папераджальныя стрэлы, але кіроўца працягваў ігнараваць іх патрабаванні. Заехаўшы ў гаражны масіў у Сёмкаве, ён спыніўся, бо ў машыне лопнула кола, і спрабаваў уцячы. Падчас затрымання малады чалавек аказваў супраціўленне.
Кіроўцам аказаўся жыхар Сёмкава 1985 года нараджэння, які не меў правоў на кіраванне транспартнымі сродкамі.
Малады чалавек затрыманы за кіраванне ў нецвярозым выглядзе ўжо ў пяты раз, у дачыненні да яго за язду ў стане алкагольнага ап'янення двойчы распачыналі крымінальную справу. На гэты раз у крыві парушальніка было выяўлена 1,44 праміле алкаголю.
Паводле слоў кіроўцы, вечарам ён піў піва, пасля чаго сеў за руль. Убачыўшы супрацоўнікаў ДАІ, спалохаўся, спадзяваўся, што здолее ўцячы. У дачыненні да парушальніка складзены чатыры адміністрацыйныя пратаколы.
Цяпер чытаюць
У Чэхіі малады беларус трапіў у кому — наглытаўся таблетак праз праблемы з легалізацыяй і разрыў з дзяўчынай8
Каментары