U ledaviku kala Antarktydy znajšli cieła navukoŭca, jaki zahinuŭ u 1959 hodzie
Kala Antarktydy ŭ ledaviku znajšli pareštki brytanskaha daśledčyka Denisa Bieła, jaki zahinuŭ ažno 66 hadoŭ tamu, paviedamili ŭ Brytanskaj antarktyčnaj słužbie.
Denis Bieł zahinuŭ u 1959 hodzie va ŭzroście 25 hadoŭ, kali padčas pachodu na ledavik dla hieadezičnych i hieałahičnych daśledavańniaŭ pravaliŭsia ŭ treščynu.
Spačatku jaho ŭdałosia častkova padniać z hłybini kala 30 mietraŭ, ale paśla viaroŭka abarvałasia i jon znoŭ upaŭ. Paśla hetaha mužčyna ŭžo nie padavaŭ prykmiet žyćcia. Pošuki doŭžylisia 12 hadzin, ale ŭmovy śniežnaj bury i hłybinia ledavika zrabili vyratavańnie niemahčymym.
Cieła brytanca zastavałasia ŭ ledaviku da studzienia 2025 hoda, kali polskija daśledčyki vyjavili jaho dziakujučy tajańniu lodu. Identyfikacyju praviali pa DNK, i ciapier siamja zmahła aficyjna pachavać pareštki navukoŭca praz 66 hadoŭ paśla trahiedyi.
Denis Bieł byŭ starejšym z čatyroch dziaciej u siamji z Łondana. Jon pracavaŭ radystam, a potym mietearołaham u arhanizacyi Falkland Islands Dependencies Survey i ŭ 1958 hodzie adpraviŭsia ŭ dvuchhadovuju ekśpiedycyju na vostraŭ Kinh-Džordž, što prykładna za 120 km ad Antarktydy.
Kiraŭnica Brytanskaj antarktyčnaj słužby Džejn Frensis nazvała znachodku kranalnym momantam i adznačyła, što Bieł byŭ adnym z tych mužnych supracoŭnikaŭ, jakija ŭnieśli svoj układ u rannija navukovyja daśledavańni Antarktydy ŭ vielmi surovych umovach.
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju18
Kamientary