Padpał u vilenskaj IKEA letaś zładziŭ ukrainski padletak. Jon zachoŭvaŭ na vakzale sumku z vybuchoŭkaj, telefonami i vibratarami

Viadoma, što Daniła Bardadym vyras u Chiersonie, jahonaja maci žyvie tam dahetul.

NYT piša, što zachodnija śpiecsłužby ŭsio čaściej fiksujuć sproby Rasii vykarystoŭvać ludziej z trecich krain — asabliva maładych — dla napadaŭ u Jeŭropie, maskirujučy heta pad «pracu za hrošy». U vypadku z Bardadymam havorka idzie pra padletka, jaki akazaŭsia ŭciahnuty ŭ niebiaśpiečnuju hulniu i staŭ zbrojaj u čužoj vajnie.

Uvohule za apošnija dva hady niamała handlovych centraŭ, składoŭ, padvodnych kabielaŭ i čyhunak u Jeŭropie paciarpieła ŭ vyniku taho, što Centr stratehičnych i mižnarodnych daśledavańniaŭ apisvaje jak imknieńnie pasiejać chaos pad kiraŭnictvam rasijskaj vajskovaj raźviedki — HRU.

U spravie z padpałam kramy IKEA jość vielmi dziŭny epizod. U kamiery zachoŭvańnia na vakzale ŭ Vilni Bardadym pakinuŭ sumku, u jakoj lažali vybuchoŭka, šeść mabilnych telefonaŭ, čatyry detanatary — i čamuści dva vibratary. Ich pryznačeńnie pravaachoŭnym orhanam dahetul niezrazumieła, ale jany fihurujuć u spravie jak «pradmiety nievyraznaha vykarystańnia».

Śledčyja ŭpeŭnienyja, što chłopiec dziejničaŭ nie adzin. Viasnoj 2024 hoda jon i jahony saŭdzielnik sustrelisia ŭ Polščy z kuratarami, ad jakich atrymali zakaz — padpały i vybuchi ŭ Litvie i Łatvii za 10000 jeŭra. Kantakt z zakazčykami išoŭ praz Telegram i kitajski mabilny dadatak Zangi — małaviadomuju płatformu, jakaja dazvalaje abmieńvacca paviedamleńniami i fajłami za miežami pola zroku zachodnich śpiecsłužbaŭ.

8 maja 2024 hoda Bardadym ustalavaŭ u IKEA samarobnuju zapalnuju pryładu z hadzinnym miechanizmam i na nastupny dzień viarnuŭsia, kab źniać videa pažaru. Zapis jon adpraviŭ kurataram, pazbaviŭsia ad astatnich ulik, pieraapranuŭsia i pajechaŭ u Varšavu. Tam, pavodle źviestak NYT, jon atrymaŭ «apłatu» — siedan BMW 530. Ale najaŭnych hrošaj jamu nie dali.

Na hetym historyja nie skončyłasia. Užo 13 maja Bardadym viarnuŭsia ŭ Litvu, kab vykanać nastupny terakt. Jon znoŭ nakiravaŭsia da svajoj schovanki — miarkujučy pa ŭsim, pa čarhovuju partyju abstalavańnia. Ale pa darozie ŭ Ryhu jaho zatrymali pad Paniaviežysam supracoŭniki kryminalnaj palicyi i śpiecnaza «Aras». U chłopca pry sabie znoŭ byli vybuchoŭka i instrukcyi pa jaje ŭžyvańni.

Litoŭskija śledčyja ličać, što Bardadyma i inšych udzielnikaŭ napadu na IKEA ŭ asnoŭnym matyvavali hrošy.

U minułym miesiacy hienieralny prakuror Litvy Arturas Urbielis nazvaŭ ich «maładymi ludźmi, jakim vidavočna nie chapaje žyćciovaha dośviedu «i jakija praz kanflikt» apynulisia ŭ ciažkim materyjalnym stanoviščy». Jon dadaŭ, što jany, mahčyma, «nie razumieli kančatkovaj mety» tych, chto, chavajučysia za psieŭdanimami ŭ sacyjalnych sietkach, zamaŭlaŭ i nakiroŭvaŭ ich pracu.

Ludzi, jakich viarbuje HRU, «vidavočna nie prafiesijanały, bo ich lohka złavić, jany časta znachodziacca ŭ ciažkim finansavym stanoviščy i ich pryciahvajuć «prapanovy chutkich i lohkich hrošaj», skazaŭ dyrektar Departamienta dziaržbiaśpieki Darus Jaŭniškis. Pryciahvajučy navabrancaŭ u sacsietkach, rasijskija śpiecsłužby «prosta zakidvajuć rybałoŭnuju sietku, kab pahladzieć, chto klunie», dadaŭ jon.

Na pytańnie, ci ŭdałosia znajści jakija-niebudź dokazy taho, što Bardadym śviadoma zapisaŭsia ŭ dyviersanty, hienieralnaja prakuratura Litvy adkazała, što «niama nijakaj infarmacyi, jakaja śviedčyć pra toje, što abvinavačany prytrymlivajecca prarasijskich pohladaŭ».

• 2
• 0
• 2
• 5
• 3
• 0
• 3
• 0