Knyrovič try hady pracavaŭ u supolnaści błohieraŭ «Infapojnt», ale ciapier raźvitaŭsia z abjadnańniem

Biznesmien Alaksandr Knyrovič napisaŭ u sacsietkach, što vyjšaŭ z kaalicyi błohieraŭ «Infapojnt» (jurydyčnaja asoba IMN Stream, raniej — Infopoint Media Network). Ciapier jon źbirajecca samastojna raźvivać prajekt «Knyrovič. Płan».

«Infapojnt» byŭ stvorany ŭ 2020 hodzie pa inicyjatyvie Franaka Viačorki. Błohiery i niekalki miedyja, jakija ŭvajšli ŭ kaalicyju, kaardynavalisia miž saboj, abmieńvalisia infarmacyjaj. Pakolki im było składana paasobku šukać finansavańnie, hetu zadaču ŭziało na siabie kiraŭnictva «Infapojnta». Siarod publičnych udzielnikaŭ kaalicyi nazyvalisia «Biełaruś hałaŭnoha mozhu», Kyky.org, The Village Belarus. Takija bujnyja niezaležnyja miedyja, jak «Naša Niva», «Zierkało», «Radyjo Svaboda», «Biełsat», u «Infapojnt» nikoli nie ŭvachodzili. Praź niekatory čas Viačorka adyšoŭ ad prajektu i zaniaŭsia palityčnaj dziejnaściu. Arhanizacyjaj kiravała Saša Ramanava, byłaja dyrektarka Kyky.org.

Mnohija abvinavačvali błohieraŭ z «Infapojnta», što jany całkam padparadkavanyja Ofisu Śviatłany Cichanoŭskaj. Knyrovič abviarhaje takuju praktyku.

«Za 150 płaniorak «Infapojnta» ź lutaha 2022 hoda ja ni razu nie bačyŭ tam Franaka Viačorku, bolš za toje — i duchu jaho nie adčuvaŭ. Heta značyć, za ŭsie 3 hady nie było nivodnaha kirujučaha ŭkazańnia z boku Ofisa ni mnie, ni ŭ majoj prysutnaści. Čutki ab «vialikim i žudasnym» lalkavodzie «Infapojnta» — tolki čutki», — zapeŭnivaje jon.

Jak Knyrovič raskazaŭ «NN», u jaho nie było nijakaj pasady ŭ «Infapojncie». Jon udzielničaŭ naroŭnie z astatnimi ŭdzielnikami kaalicyi, atrymlivaŭ finansavuju padtrymku na prajekt.

«Ale heta zusim nievialikija sumy, jany nie mohuć zakryć patreby čałavieka na miesiac. Try hady tamu my z Sašaj Ramanavaj damovilisia ab tym, što jany buduć padtrymlivać moj asabisty jutub-kanał. Była damoŭlenaść, što pracujem adzin «elektaralny cykł». Kantrakt skončyŭsia — tamu ja i syšoŭ».

Pavodle infarmacyi «Našaj Nivy», u 2024 i 2025 hodzie niekatoryja błohiery, prajekty i telehram-kanały hetaksama pakinuli «Infapojnt» i pierajšli ŭ svabodnaje płavańnie. Heta adbyłosia tamu, što ŭ dyrektarki abjadnańnia Sašy Ramanavaj byli pretenzii da błohieraŭ nakont ich dyscyplinavanaści. Im ža nie padabałasia, što bolšaść biudžetu kaalicyi idzie na prajekt Knyroviča.

Saša Ramanava nie stała kamientavać situacyju «Našaj Nivie».

• 2
• 1
• 4
• 6
• 1
• 0
• 0
• 0