Samalot Baku-Hrozny, padobna, byŭ padbity z rasijskaha zienitna-rakietnaha kompleksu
Rejs Baku — Hrozny raźbiŭsia siońnia ranicaj kala horada Aktau na zachadzie Kazachstana.
Samalot pavinien byŭ pryziamlicca ŭ Hroznym, ale, pa aficyjnaj viersii, nie zmoh sieści tam praz mocny tuman i byŭ pieranakiravany ŭ Kazachstan.
U Rasaviacyi paviedamlali, što na zapasny aeradrom u Aktau samalot vyrašyŭ kiravacca paśla sutyknieńnia z ptuškami, što pryviało da pazaštatnaj situacyi na borcie.
Kazachstanskija vydańni pisali taksama, što na borcie ŭzarvaŭsia hazavy bałon.
Razam z tym viadoma, što ranicaj na Čačniu była ataka dronaŭ. I aeraport u Hroznym moh być zakryty z hetaj pryčyny. Da taho ž, kali b sprava była ŭ tumanie, było b łahičniej pieranakiravać samalot u Machačkału, bo heta bližej za Aktau. U Machačkale, zhodna z tabło aeraporta, u 7:00 i 7:20 sadzilisia samaloty, piša «Ahientstvo».
Ataku bieśpiłotnikaŭ na Čačniu paćvierdziŭ taksama plamieńnik Ramzana Kadyrava, sakratar Rady Biaśpieki Čačni Chamzat Kadyraŭ.
Jość viersija, što łajnier mahła źbić rasijskaja supraćpavietranaja abarona.
Paśla apošnich atak dronaŭ na Čačniu ŭ respublicy było ŭstanoŭlena niekalki «Pancyraŭ». Pa fota abłomkaŭ rakiet srodkaŭ SPA vidać, što «Pancyry» byli zadziejničanyja ŭ adbićci ranišniaj ataki bieśpiłotnikaŭ na Čačniu. Prykładna ŭ hety ž čas adbyłosia nadzvyčajnaje zdareńnie na borcie samalota Azerbaijan Airlines, jaki nakiroŭvaŭsia ŭ Hrozny. Pasažyry kažuć pra niejki vybuch pobač z samalotam, piša telehram-kanał «VČK-OHPU».
Na videa, dzie bačna abšyŭka chvasta samalota paśla padzieńnia, zaŭvažnyja praboiny. Jany vyhnutyja ŭsiaredzinu — pa hetym možna mierkavać, što vybuch byŭ zvonku samalota. Heta taksama moža kazać na karyść viersii, što pobač z samalotam uzarvałasia rakieta, vypuščanaja z «Pancyra» z metaj źbić drony.
U azierbajdžanskich ŚMI i błohach źjaviłasia videa z sałona samalota, kali toj jašče znachodziŭsia ŭ pavietry. Na hetym videa žančyna, jakuju, imavierna, paraniła askołkam, siadzić z vyciahnutaj nahoj, a pobač vidać čyrvonaja plama, padobnaja na plamu kryvi.
Pra trapleńnie askiepkaŭ u sałon samalota paviedamlali i inšyja pasažyry. Adzin ź ich raskazaŭ RT, što padčas treciaha niaŭdałaha zachodu na pasadku ŭ Hroznym za miežami borta adbyŭsia vybuch, padčas jakoha adlacieŭ kavałak ašaloŭki pobač ź im, paśla čaho ŭ vyratavalnaj kamizelcy jon vyjaviŭ dzirku.
Da viersii datyčnaści rasijskaj SPA schilajucca i pravajennyja rasijskija kanały.
Pravajenny błohier Juryj Padalaka ličyć, što «mienavita tak vyhladajuć paškodžańni ad pracy ZRK».
Z-kanały «Biełorusskij siłovik» i «MIH Rośsii» pišuć, što praboiny na samalocie padobnyja da śladoŭ ad «paražalnych elemientaŭ abo askiepkaŭ».
Ale niekatoryja rasijskija i biełaruskija prapahandysckija kanały sprabujuć pierakanać, što pryčynaj avijakatastrofy stali ŭkrainskija bieśpiłotniki.
Na borcie samalota Baku-Hrozny było 67 čałaviek (62 pasažyry i 5 členaŭ ekipažu). Zahinuli 38 čałaviek, paviedamiŭ vice-premjer Kazachstana Kanat Bazumbajeŭ. Špitalizavanyja 29 čałaviek, u tym liku troje dziaciej. 11 ź ich u ciažkim stanie.
Azerbaijan Airlines paśla ranišniaj katastrofy admianiła ŭsie rejsy na Paŭnočny Kaŭkaz Rasii.
Kamientary