Aficyjna paćvierdziłasia trahičnaja pryčyna śmierci chakieista Uładzimira Cypłakova
Słavuty spartsmien pajšoŭ z žyćcia ŭ śniežni 2019 hoda.
U paśviedčańni ab śmierci chakieista Uładzimira Cypłakova pryčynaj śmierci paznačana «aśfiksija». Takaja infarmacyja ŭtrymlivajecca ŭ bazie dadzienych pamierłych žycharoŭ Biełarusi, jakuju atrymali «Kibierpartyzany».
Nahadajem, Uładzimir Cypłakoŭ pajšoŭ z žyćcia piać hadoŭ tamu, 14 śniežnia 2019 hoda. Jamu tady było 50 hadoŭ. Pryčyna śmierci nie nazyvałasia. Hazieta «Presboł» adznačała, što heta adbyłosia «pry trahičnych i da kanca nie vyśvietlenych abstavinach». Krynicy «Našaj Nivy» paviedamlali, što chakieist skončyŭ žyćcio samahubstvam. Ciapier heta infarmacyja faktyčna paćvierdziłasia.
Cypłakova pachavali na prestyžnych Uschodnich mohiłkach Minska. Alaksandr Łukašenka na cyrymoniju raźvitańnia nie pryjšoŭ, adpraviŭ zamiest siabie vianok.
Uładzimir Cypłakoŭ — uradženiec Rasii, jaki na momant raspadu SSSR hulaŭ u minskim «Dynama», tamu staŭ hramadzianinam Biełarusi. Jon pieršy biełarus, jaki stała zahulaŭ u NCHŁ, vystupaŭ za «Łos-Andželes Kinhz» i «Bafała Sejbarz». Trojčy pryznavaŭsia najlepšym chakieistam Biełarusi. Paśla karjery sprabavaŭ siabie ŭ jakaści treniera, ale nie nadta siabie zarekamiendavaŭ na hetaj nivie. Pierad tym, jak pajści z žyćcia, jon dva hady nie moh znajści pracu.
Los troch biełaruskich chakieistaŭ, jakija hulali ŭ NCHŁ, skłaŭsia trahična. Rusłan Salej zahinuŭ u avijakatastrofie, a Uładzimir Cypłakoŭ i Kanstancin Kalcoŭ skončyli žyćcio samahubstvam.
Kamientary