U Biełarusi płanujuć panizić achoŭny status zubra i buraha miadźviedzia, a chamiakoŭ, naadvarot, pavysić
U novym vydańni Čyrvonaj knihi pierahledziać achoŭny status šerahu žyvioł i ptušak. U tym liku — zubra.
Śpiecyjalisty NAN Biełarusi prapanujuć źmianić achoŭny status dla siami vidaŭ mlekakormiačych u novym vydańni Čyrvonaj knihi.
Zubra płanujuć pieravieści z III na IV, bolš słabuju, katehoryju achovy. Śpiecyjalist pa bijaresursach Pavieł Hieštoŭt raskazaŭ, što za apošnija 30 hadoŭ kolkaść zubroŭ u Biełarusi pavialičyłasia ŭ dzieviać razoŭ i ciapier pieravyšaje 2 700 asobin, ź jakich 2 600 žyvuć na voli ŭ dziesiaci papulacyjach, pišuć «Minsk-Naviny».
Pavodle vydańnia, z 2011 hoda Biełaruś stała lidaram pa kolkaści zubroŭ na voli, a z 2018 hoda – i pa ahulnaj kolkaści.
Dla buraha miadźviedzia taksama prapanujecca źmiena katehoryi achovy — z I na IV. Kolkaść miadźviedziaŭ uzrasła z kala 130 asobin u kancy 1980-ch da prykładna 800 u ciapierašni čas.
Źmieniać z III na IV achoŭny statut rysi i barsuka. Pieršych u krainie ŭžo 1600 asobin, jany sustrakajucca na 60 pracentach terytoryi Biełarusi. Kolkaść barsukoŭ uzrasła z 800—1600 asobin u 2000-ch da 2500—2700 u 2021-2023 hadach.
A voś chamiaka zvyčajnaha śpiecyjalisty prapanujuć pieravieści z III u I katehoryju achovy.
Akramia taho, uklučyć u Čyrvonuju knihu prapanujuć novy vid — hihanckuju viačernicu, prysvoiŭšy joj I katehoryju nacyjanalnaj pryrodaachoŭnaj značnaści. Samy vialiki ŭ Jeŭropie kažan znachodzicca na miažy źniknieńnia ŭ Biełarusi. Niadaŭna śpiecyjalisty znajšli kałoniju viačernic u Žytkavickim rajonie.
Siarod ptušak prapanujecca vyklučyć adzin vid — aŭdotku, bo jana bolš nie sustrakajecca ŭ Biełarusi. Zamiest hetaha płanujecca ŭklučyć u knihu try novyja vidy, siarod jakich hłušec (zachodni padvid) u II katehoryju achovy. Hety padvid redki i raspaŭsiudžany ŭ Litvie, Polščy i Zachodniaj Biełarusi. Z 2022 hoda ŭ krainie realizujecca prahrama pa jaho raźviadzieńni i raśsialeńni.
Źmieny ŭ Čyrvonuju knihu doŭhi čas łabirujuć palaŭničyja. Navukoŭcy ž da hetaha supraciŭlalisia źmienam.
Ciapier čytajuć
«Čaho ź ludziej ździekujeciesia?!» Łukašenka zahadaŭ prybrać maršrutki42
Kamientary