«Biednyja tyja terarysty, u jakich uźniknie takaja dumka». Daraškievič pra abvinavačvańni z boku ANT u stvareńni radyjenuklidnych dronaŭ
Aktyvistka Volha Ciškievič viarnułasia ŭ Biełaruś i raskazała na ANT, što jaje byłyja paplečniki byccam by stvarali drony z radyjenuklidami i rychtavali terakt na Astravieckaj AES. Pavodle Ciškievič, hetym byccam by zajmaŭsia navukoviec i miedyk Aleh Daraškievič. Spytali jaho samoha pra heta.
Z Volhaj Ciškievič jon dobra znajomy. Charaktaryzuje eks-aktyvistku jak vymatanaha žyćciom čałavieka sa słabym zdaroŭjem:
«Jana dyzajnierka adzieńnia, talenavitaja žančyna ź ciažkim losam. Dumaju, jana trapiła ŭ łapy hetych ludziej biez sumleńnia i honaru i pad ich ciskam mahła nahavaryć usio što chočaš. Heta jaŭna nadumanyja rečy, jakija prosta nie pryjduć zdarovamu čałavieku ŭ hałavu.
Toje, što my płanavali niejkija terakty, absalutna nie adpaviadaje rečaisnaści».
Daraškievič miarkuje, što Volhu zaciahnuli ŭ pastku, i ciapier jana vymušanaja lić brud na paplečnikaŭ.
Aleh raniej zajmaŭsia likvidacyjaj nastupstvaŭ avaryi na ČAES i razumieje, nakolki Biełaruś paciarpieła ad toj katastrofy. Jon kaža, što ŭ zdarovym rozumie nie staŭ by zajmacca takimi teraktami, bo dakładna viedaje, što heta samahubstva. Tym bolš što da techničnaha boku «terakta» jość pytańni:
«Dronami ničoha nie zrobiš z atamnaj stancyjaj, tam vielmi surjoznaja abarona, i nijakija terarysty nie daduć joj rady. Tam usio pradumana, kab roznyja varjaty nie sprabavali zrabić ničoha hibielnaha dla ŭsiaho čałaviectva».
Aleh raskazvaje, što niekali jon nasamreč zajmaŭsia prajektam, źviazanym z dronami. U časy pandemii taki prajekt musiŭ by dapamahčy dastaŭlać supraćkavidnyja vakcyny, i Daraškievič z paplečnikami chacieli raspracavać adpaviednuju płatformu dla hetaha.
Takija drony, kaža navukoviec, u pierśpiektyvie mahli b dastaŭlać i leki. U suśvietnaj praktycy vykarystoŭvajuć hetuju ideju — naprykład, dronami dastaŭlali vakcyny ŭ afrykanskich krainach.
Ciškievič pakazała ŭ efiry ANT fota «drona», i Aleh raskazvaje, adkul jano mahło źjavicca:
«U tym miescy, kudy jana taksama prychodziła, stajali karkasy hetych dronaŭ z časoŭ pandemii. Napeŭna, jana ich tady sfatahrafavała».
Ideju z dronami da praktyčnaj realizacyi tak i nie daviali.
Ciškievič kazała pra toje, što dron ad Daraškieviča byccam by musiŭ raspylać vadkaść z radyjenuklidami nad Ukrainaj i Biełaruśsiu, a potym navukoviec prymianiŭ by «kvantavuju mietodyku adnaŭleńnia» hetych ziemlaŭ. Takija tezisy vyklikajuć u Aleha śmiech:
«Heta takaja duraść! Kali rasijskaja armija zachapiła Zaparožskuju AES, abmiarkoŭvali, byccam by tam płanujuć uzarvać brudnuju bombu. Mahčyma, jana niedzie heta pačuła, ale taja historyja nijak nie źviazanaja z dronami. Hetaja ideja z dronami — usio roŭna što vyčerpvać mora pipietkaj. Biednyja tyja terarysty, u jakich uźniknie takaja dumka».
«Naša Niva» — bastyjon biełaruščyny
PADTRYMAĆŠto za Dźmitryj Skindzieraŭ, jaki abviaściŭ vajnu Cichanoŭskaj? Supracoŭnictva z HUBAZiKam, daŭhi ŭ Biełarusi, daŭhi ŭ Litvie37
Kamientary