Vieniesuelskaja apazicyja chacieła zarehistravać kandydata ŭ prezidenty, ale nie zmahła załahinicca na sajcie CVK

Hałoŭnaja apazicyjnaja kaalicyja Vieniesueły z treciaj sproby zmahła zarehistravać kandydata na lipieńskich prezidenckich vybarach. Pieršych dźviuch kandydatak ułady zabłakavali, piša Bi-bi-si.

Kaalicyja «Adzinaja płatforma» (Plataforma Unitaria, PU) u sieradu abviaściła, što dziakujučy padaŭžeńniu terminu rehistracyi dla adnoj z partyj, jakija ŭvachodziać u jaje, zdoleła zarehistravać kandydatam u prezidenty byłoha dypłamata Edmunda Hansalesa.

Pry hetym apazicyjaniery padkreślili, što Hansales budzie časovym kandydatam, zarehistravanym tolki tamu, što ŭ ich pakul niama mahčymaści zarehistravać taho, kaho jany chacieli. Pavodle vieniesuelskich praviłaŭ, partyi da 20 krasavika mohuć zamianiać kandydataŭ.

Apazicyjnym kandydatam treba budzie pazmahacca z prezidentam Nikałasam Madura, nastupnikam pamierłaha ŭ 2013 hodzie Uha Čaviesa.

«Adzinaja płatforma» spačatku abrała svaim kandydatam 56-hadovuju Maryju Karynu Mačada — daśviedčanaha palityka, byłoha deputata parłamienta i adnaho ź lidaraŭ apazicyi. Mačada sabrała na prajmieryz apazicyi bolš za 90% hałasoŭ, i vakoł jaje fihury abjadnalisia samyja roznyja apazicyjnyja partyi, u tym liku tyja, što vajavali pamiž saboj.

Adnak jašče da prajmieryz vieniesuelskija ŭłady abvinavacili Mačada ŭ supracoŭnictvie z Chuanam Huajdo i padtrymcy sankcyj suprać Vieniesueły i na 15 hadoŭ zabaranili joj udzielničać u vybarach. Jana padała apielacyju, ale Viarchoŭny sud, ukamplektavany prychilnikami Madury, skarhu adchiliŭ.

Pierad samym zakryćciom časavaha akna dla rehistracyi kandydataŭ, u minułuju piatnicu, apazicyjnaja kaalicyja vyrašyła zarehistravać zamiest Mačada 80-hadovuju navukoŭcu Karynu Jorys.

Adnak sproby ŭnieści jaje kandydaturu ŭ śpis natyknulisia na niepieraadolnuju pieraškodu. Apazicyjaniery zapisali i raspaŭsiudzili ŭ sacsietkach videa, u jakim jany šmat razoŭ sprabujuć załahinicca na sajcie vybarčaj kamisii — i nie mohuć hetaha zrabić.

Paśla hetaha, adnak, ułady praciahnuli termin rehistracyi kandydata adnoj z partyj kaalicyi — i apazicyjaniery zarehistravali Hansalesa.

Usiaho ŭ vybarach prezidenta Vieniesueły 28 lipienia, u dzień 70-hodździa niabožčyka Uha Čaviesa, akramia Nikałasa Madura, voźmuć udzieł 12 kandydataŭ, ale častka ź ich łajalnaja

Madura źbirajecca pieraabracca ŭžo na treci šaścihadovy termin. U lutym jon zajaviŭ svaim prychilnikam: «My pieramožam — nie myćciom, tak katańniem. My zaŭsiody budziem pieramahać».

Ekanomika Vieniesueły ŭ apošnija try hady vyjšła ź pikie, u jakoje zvaliłasia ŭ 2012 hodzie ŭ vyniku levaj papulisckaj palityki Čaviesa i zatym Madury.

Adnak pra adnaŭleńnie havorki pakul niama: VUP na dušu nasielnictva ŭ krainie, jakaja vałodaje najbujniejšymi ŭ śviecie zapasami nafty, ciapier prykładna ŭ čatyry razy mienšy, čym 12 hadoŭ tamu.

• 0
• 0
• 1
• 0
• 2
• 3
• 6
• 0