«Pajšli ratavać chłopčyka — i sami zhubilisia». Jak dziaŭčynki-daškolnicy akazalisia adny ŭ lesie

U adroźnieńnie ad toj historyi, ciapier usio skončyłasia dobra: pošukavaja hrupa znajšła siaścior za try kiłamietry ad doma i pieradała miedykam. Onliner.by raskazvaje padrabiaznaści.

Dziaŭčynak zavuć Daryna i Valeryja, im było ŭsiaho 4 i 2 hady. U milicyi paviedamili, što 10 sakavika kala 18:20 jany vyjšli ad babuli ŭ vioscy Rybcy i pajšli dadomu (adlehłaść — prykładna 600 mietraŭ). Da doma małyja nie dajšli, a znojdzienyja byli praz bolš za dzieviać hadzin u lesie. Jakim čynam jany tam akazalisia?

Jak raskazała Onliner kaardynatar atrada PVA «Anioł» Julija Koŭhan-Kudašava, chutčej za ŭsio, dziaŭčynki źbilisia z darohi, kali pajšli śledam za susiedskim chłopčykam.

— Zrazumieła, što z-za ŭzrostu dziaŭčynki nie mohuć tołkam rastłumačyć, što adbyłosia. Pa abryŭkach infarmacyi my sabrali takuju karcinu: dziaŭčynki byli ŭ haściach u prababuli i hulali z chłopčykam hadoŭ 6-7, jaki pryjazdžaje tudy na vychodnyja ź Minska.

Hety chłopčyk vyrašyŭ ich pravieści dadomu. Pa darozie dziaŭčynki zahulalisia i vypuścili jaho z-pad uvahi. Jany padumali: napeŭna, jon zhubiŭsia, i pajšli ŭ bok lesu jaho šukać. U vyniku sami zabłukali.

Svajaki zabili tryvohu, i pačalisia aktyŭnyja pošuki. Udzielničali ŭ ich bolš za 600 čałaviek — rabotniki MNS, MUS, vajskoŭcy, a taksama dobraachvotniki pošukavych atradaŭ.

— A 19:48 u nas źjaviłasia paviedamleńnie pra zbor, ciaham hadziny na miesca vyjechali kinołahi, jakija całkam vypadkova pobač akazalisia na treniroŭcy. I pastupova kamplektavalisia atrady z dobraachvotnikaŭ, — raspaviali ŭ PSA «Anioł». — Achvotnych dapamahčy było vielmi šmat, ale my razumieli, što, kali nie znojdziem apieratyŭna dziaŭčynak, častka ludziej pavinny buduć praciahnuć pošuki z ranicy z novymi siłami. Kali b nie tarmazili ludziej, ich było b jašče bolš. Heta sapraŭdy samaja maštabnaja pošukavaja apieracyja z 2017 hoda.

@nashanivanews U Puchavickim rajonie 600 čałaviek šukali dźviuch dziaŭčynak. Jany zabłukali ŭ lesie #biełaruś #biełaruskityktok #biełaruśnovosti #našaniva #biełaruskajamova #mova #puchoviči #poisk ♬ Tragic Loss - Tele Music

Kali ŭ pošukach udzielničaje tak šmat ludziej, za karotki termin možna pračasać vialikuju terytoryju.

I mienavita pry ahladzie miascovaści adzin z žycharoŭ vyjaviŭ šapačku dziaŭčynki, a kinołahi znajšli biezrukaŭku i štoniki. Julija miarkuje, što dziaŭčynki stali raspranacca pierad snom, jak ich vučyli baćki. Tak časta byvaje ź dziećmi zusim maleńkaha ŭzrostu.

Za 300 mietraŭ ad rečaŭ znajšlisia i sami dzieci. Jany paśpieli prajści kala 2,5 kiłamietra ad doma prababuli.

— Naohuł terytoryja tam niebiaśpiečnaja — na šlachu sustrakalisia mielijaracyjnyja kanały, burałomy, u baku — raka Śvisłač. Nie chaciełasia dumać pra drennaje, ale heta naściarožvała vielmi mocna. Usie siły byli nakiravanyja mienavita na toj učastak, dzie znajšli šapačku, — dzielicca padrabiaznaściami Julija. — Z boku lesu pačaŭ pracavać naš apieratar z dronam ź ciepłavizaram. Jon ubačyŭ dziaŭčynak i adnačasova pa kamiery zaŭvažyŭ, što da dziaciej nakiravalisia ludzi, jakija pračesvali terytoryju. Na ščaście, siostry nikudy nie schavalisia, heta mahło b uskładnić zadaču.

Maładyja ludzi, jakija znajšli dziaŭčynak, raspaviali, što małodšaja ŭ hety momant užo spała, a starejšaja siadzieła pobač. Dzieci byli napałochanyja, ale davoli chutka pryjšli ŭ siabie. U mašynie Daryna navat zajaviła, što bačyła ŭ lesie vaŭka (videa dadziena «Aniołam»).

Paśla ahladu daktaroŭ dziaŭčynak špitalizavali z papiarednim dyjahnazam «ahulnaje pieraachaładžeńnie». Ciapier ich zdaroŭju ničoha nie pahražaje, paviedamlajuć u Ministerstvie achovy zdaroŭja.

— Stan stabilny i nie vyklikaje tryvohi. Płanujecca paśla praviadzieńnia nieabchodnych dadatkovych miedycynskich kansultacyj adpravić małych dadomu.

• 46
• 0
• 0
• 2
• 2
• 1
• 10
• 0