Były aktyvist «Alternatyvy» pjanym patanuŭ u Turcyi. I navioŭ błytaniny, vydajučy siabie za padpałkoŭnika-putčysta
Padrabiaznaści trahičnaj historyi, pra jakuju pišuć miedyja ŭ tureckaj Antalii.
«Alaksiej Šubara (Aliaksei Shubara), jaki słužyŭ padpałkoŭnikam u svajoj krainie Biełarusi, uziaŭ udzieł u niaŭdałaj sprobie pieravarotu, paśla čaho akazaŭsia ŭ vyšuku i ŭciok u Anhliju. Jon patanuŭ na ŭźbiarežžy Tasmur u Ałanii, kudy pryjechaŭ u adpačynak», — paviedamlaje tureckaje vydańnie, udakładniajučy, što biełarus pajšoŭ u mora hołym i pjanym.
Chto ž hety padpałkoŭnik-putčyst? U łukašenkaŭskich ukazach ab pazbaŭleńni zvańniaŭ sumlennych aficeraŭ takoha proźvišča niama.
U internecie Alaksiej Šubara zhadvajecca adzin raz u 2015-m hodzie, kali jon vyjšaŭ u Minsku z płakatam, jaki asudžaŭ impieryjalizm Pucina. Šubara dziejničaŭ jak aktyvist małalikaj arhanizacyi «Alternatyva», zasnavanaj byłym maładafrontaŭcam Aleham Korbanam.
Tady Šubaru zatrymali i sudzili pa administratyŭcy, paviedamlała «Svaboda».
«Alaksiej Šubara — zvyčajny chłopiec, žyvie ŭ zdymnaj kvatery na vulicy Anharskaj. Pracuje ŭ budaŭničaj firmie, bolš-mienš zarablaje na žyćcio, maje siamju, vychoŭvaje małaletniaje dzicia», — skazaŭ tady pra jaho Korban.
Bolš nikoli i nidzie taki čałaviek nie zhadvaŭsia.
«Naša Niva» źviarnułasia da baz «Biełpoła» i vyśvietliła, što ź vialikaj imaviernaściu patanuły — toj samy čałaviek z płakatam, tamu što supadajuć imia i ŭzrost.
Tady pryčym tut niejki «padpałkoŭnik»? Šubara nikoli im nie byŭ. Vyhladaje, jon prypisaŭ sabie bijahrafiju svajho baćki.
Alaksiej naradziŭsia ŭ rasijskim Nalčyku, vyras u Biełarusi, vyšejšaj adukacyi nie mieŭ, pracavaŭ stanočnikam i bietonščykam.
Pryciahvaŭsia da kryminalnaj adkaznaści, ale kampiensavaŭ škodu i nie sieŭ u turmu. Jość parušeńni za pjanku ŭ hramadskim miescy, bieźbiletny prajezd i paru administratyvak pa linii DAI.
Maci Alaksieja pracavała ŭ Hałoŭnym upraŭleńni justycyi Minabłvykankama.
A voś baćka — sapraŭdy milicyjanier. U 2001-m syšoŭ na piensiju ŭ zvańni padpałkoŭnika z pasady starejšaha inśpiektara-dziažurnaha śpiecpadraździaleńnia pa kanvajavańni HUUS Minharvykankama.
Małaimavierna, što Šubara navat byŭ udzielnikam padziej 2020 hoda. Paśla toj samaj adnoj akcyi ŭ 2015, kali jon atrymaŭ pratakoł pa 23.34, zapisy ab im u biełaruskich bazach adsutničajuć. Heta śviedčyć na karyść toj viersii, što jon, atrymaŭšy administratyŭku, u tym ža hodzie vyjechaŭ ź Biełarusi. Heta padobna da schiemy pa atrymańni palityčnaha prytułku praz zhadku ŭ ŚMI i najaŭnaść palityčnaha artykuła.
Cieła Šubary budzie pachavana na mohiłkach dla biazdomnych, kali jaho nie zabiaruć ciaham 15 sutak.
Ciapier čytajuć
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich
«Da lejtenanta pryjechała maładaja žonka, pabačyła, što adbyvajecca ŭ zonie, i zastreliłasia». Vyjšła zaklučnaja častka ŭspaminaŭ Ryhora Biarozkina pra HUŁAH i saviecki Minsk1414
Kamientary