U Ryzie pačaŭsia sud nad «palituciekačami»: ich abvinavačvajuć u vykradańni i zabojstvie biełaruskaj biznesvumien

U sudzie Ryžskaha rajona pačynajecca praces pa spravie ab vykradańni ŭ kurortnym haradku Saŭłkrasty i zabojstvie pradprymalnicy biełaruskaha pachodžańnia Iryny Minvalejevaj. Abvinavačvanymi pa spravie prachodziać dvoje hramadzian Rasii — Siarhiej i Michaił Alaksiejevy, a taksama troje hramadzian Ukrainy, adnak ich sprava vydzielenaja ŭ asobnuju vytvorčaść, paviedamlaje Delfi.lv.

Pavodle viersii śledstva, złačynnaja hrupa vykrała Minvalejevu, kab taja pierapisała na ich elitny žyllovy kompleks Sun Republic u Saŭłkrasty, jaki častkova naležaŭ joj. Nie atrymaŭšy žadanaha, mierkavanyja złačyncy žančynu zabili «pry asabliva ciažkich abstavinach».

Ale śledstvu pa-raniejšamu nieviadoma, dzie mienavita było ŭčyniena zabojstva. Infarmacyi pra toje, što cieła Minvalejevaj było znojdziena, taksama dahetul nie pastupała.

40-hadovaja hramadzianka Biełarusi, pradprymalnica Iryna Minvalejeva ŭ Łatvii zajmałasia nieruchomaj majomaściu — joj naležała 30 kvater u žyllovym kompleksie Sun Republic u Saŭłkrasty. 3 kastryčnika 2019 hoda žančyna źnikła. Pa słovach svajakoŭ, apošnim čałaviekam, ź jakim jaje bačyli ŭ toj dzień, byŭ niejki «klijent», jaki nibyta cikaviŭsia kuplaj adnoj z kvater.

Na zapisie kamiery videanazirańnia vidać, jak u 16:09 Minvalejeva razam z «pakupnikom» pakinuła terytoryju kompleksu i nakiravałasia ŭ bok miastečka Skułte. Nieŭzabavie paśla hetaha žančyna pierastała adkazvać na zvanki i źnikła bieź viestak.

Viadoma, što Siarhiej Alaksiejeŭ paprasiŭ u Minvalejevaj dać jamu kantakty žycharoŭ Sun Republic, ale atrymaŭ admovu. Adnak byŭ nastojlivy: u lipieni 2019 hoda Iryna znoŭ sustreła jaho na terytoryi kompleksu, kali pakazvała kvatery. Razmova była rezkaj — mužčyna ŭžo adkryta pahražaŭ biełaruscy departacyjaj z Łatvii. Usio heta adbyłosia pry śviedkach. Dalej kantakty Iryny z Alaksiejevym spynilisia.

U tym ža miesiacy ź Minvalejevaj pad vyhladam čarhovaha pakupnika nibyta źviazaŭsia niejki «Arkadź Šłośbierh». Jak adznačajuć svajaki Iryny (ź jaje ž słoŭ) — u elektronnych listach jon vydavaŭ siabie za rasijskaha čynoŭnika pieradpiensijnaha ŭzrostu i «demanstravaŭ dobraje vałodańnie litaraturnaj ruskaj movaj».

Adnak paźniej žančyna raspaviadała, što na sustreču źjaviŭsia mužčyna 33-37 hadoŭ, spartyŭnaha ciełaskładu i z davoli biednym słoŭnikavym zapasam.

Minvalejeva dała jamu ŭsie nieabchodnyja źviestki ab ułasnaści, niekalki razoŭ klijent zapisvaŭsia na pryjom, abiacaŭ pryjechać z žonkaj, ale raz za razam sustreču admianiaŭ.

Urešcie jany sustrelisia — 3 kastryčnika ŭ 15:30.

Pavodle viersii śledstva, pad vyhladam klijenta Irynu advioŭ u nieviadomym kirunku hramadzianin Ukrainy Siarhiej Baciašoŭ — były bajec rasfarmavanaha ŭkrainskaha bataljona «Tarnada». Jak miarkujecca, mienavita jon u adkaz na źmiakčeńnie prysudu raskryŭ usie abstaviny spravy.

Jak śćviardžaje śledstva, paśla vykradańnia mierkavanyja złačyncy damahalisia, kab Minvalejeva pierapisała na ich kompleks Sun Republic. Potym jany raspačali novuju sprobu zajmieć majomaść užo z dapamohaj falšyvaj davieranaści.

U materyjałach spravy havorycca, što padsudnyja advieźli zakładnicu ŭ nieŭstanoŭlenaje miesca i pačali dušyć. Kali nastupiła śmierć žančyny, abvinavačvanyja kinuli jaje ŭ zahadzia vykapanuju jamu i zakapali.

Abvinavačvanyja mieli ŭ svaim rasparadžeńni pravy kiroŭcy i pašpart zabitaj žančyny. Jany vyrašyli, što z dapamohaj hetych dakumientaŭ zmohuć znajści nataryusa, jaki vydaść im falšyvuju davieranaść na atrymańnie majomaści pradprymalnicy.

Ab stvareńni falšyvaj davieranaści abvinavačvanyja damovilisia ź jašče adnym hramadzianinam Ukrainy. «Dakumient» byŭ adpraŭleny ŭ Łatviju praź mižnarodnuju łahistyčnuju kampaniju. Paźniej falšyvaja davieranaść była kanfiskavanaja palicyjaj.

Sami abvinavačvanyja nie pryznajuć svajoj viny va ŭčynieńni złačynstvaŭ i zajaŭlajuć, što abvinavačańnie — «zamoŭnaje», što jano maje «palityčny charaktar» i zaklikana «nanieści značnuju škodu łatvijska-ŭkrainskim adnosinam».

• 9
• 0
• 1
• 9
• 4
• 13
• 72
• 0