Viadomyja ludzi, noŭnejmy i 10 čałaviek, čyje imiony nie nazyvajucca. Chto ŭvajšoŭ u abnoŭlenuju Kaardynacyjnuju radu
Kaardynacyjnaja rada apublikavała abnoŭleny skład. Nazvanyja imiony 53 čalcoŭ i 22 arhanizacyj. Usiaho ŭ składzie Rady 117 čalcoŭ.
U Radzie kažuć, što imiony kala 10 čalcoŭ vyrašana nie abjaŭlać u «siłu peŭnych abstavin».
Čalcy Rady vyłučanyja arhanizacyjami i supolnaściami. Nie ŭsie jany nazyvajucca. Taksama jość i samavyłučency.
Siarod čalcoŭ Rady:
- Pavieł Łatuška — były ministr kultury, kiraŭnik Narodnaha antykryzisnaha ŭpraŭleńnia i namieśnik kiraŭnika Abjadnanaha pierachodnaha kabinieta;
- Śviatłana Aleksijevič — nobieleŭskaja łaŭreatka pa litaratury;
- Siarhiej Dyleŭski — prafsajuzny dziejač, były rabotnik MTZ;
- Volha Kavalkova — palityk, sustaršynia partyi Biełaruskaja chryścijanskaja demakratyja;
- Taćciana Marynič — kiraŭnica Imaguru, pradstaŭlaje intaresy biznesu;
- Valeryj Mackievič — hramadski dziejač, były čalec štaba Valeryja Capkały, pradstaŭlaje prajekt «Uschodniaje partniorstva»;
- Andrej Jahoraŭ — palitołah, pradstaŭnik hramadzianskaj supolnaści;
- Andrej Kurejčyk — kinascenaryst, dramaturh, režysior; pradstaŭlaje intaresy kulturnaj supolnaści;
- Taćciana Chomič — siastra Maryi Kaleśnikavaj, pradstaŭlaje intaresy palityčnych źniavolenych;
- Siarhiej Čały — ekanamist;
- Alaksandr Knyrovič — biznesoviec;
- Alaksandr Dabravolski — palityk, siabra Abjadnanaj hramadzianskaj partyi, daradca Śviatłany Cichanoŭskaj;
- Aleś Michalevič — advakat, juryst, siabra ruchu «Za Svabodu»;
- Dźmitryj Kruk — supracoŭnik niezaležnaha daśledčaha centra ekanamičnych daśledavańniaŭ BEROC;
- Jan Rudzik — błohier, adzin z byłych redaktaraŭ Nexta;
- Stasia Hlińnik — unučka Stanisłava Šuškieviča, pradstaŭnica Biełaruskaha moładzievaha chaba;
- Volha Pavuk — błohierka kanała «Rudabielskaja pakazucha».
U składzie pakinuli taksama Maryju Kaleśnikavu i Maksima Znaka, jakija ciapier za kratami.
U Radzie pradstaŭlenyja BYPOL, Zadzinočańnie biełaruskich studentaŭ, Centr biełaruskaj salidarnaści, «Ekadom», Legalize Belarus, a taksama arhanizacyi i inicyjatyvy, stvoranyja biełaruskaj dyjasparaj.
Całkam śpis čalcoŭ i arhanizacyj možna pahladzieć tut. Mnohija imiony novyja dla šyrokaj hramadskaści.
Siarod 117 čalcoŭ — 73 delehaty, 15 samavyłučencaŭ, 21 stary aktyŭny čalec i 8 čałaviek za kratami.
Kaardynacyjnaja rada była stvoranaja 20 žniŭnia 2020 hoda pa inicyjatyvie Śviatłany Cichanoŭskaj z metaju pieraadoleńnia palityčnaha kryzisu i zabieśpiačeńnia zhody ŭ hramadstvie, a taksama dla abarony suvierenitetu i niezaležnaści Biełarusi.
Prezidyum Kaardynacyjnaj rady ŭ žniŭni 2020 hoda. Źleva naprava — Pavieł Łatuška, Maryja Kaleśnikava, Volha Kavalkova, Maksim Znak, Siarhiej Dyleŭski. Łatuška, Kavalkova i Dyleŭski ciapier u emihracyi, Kaleśnikava i Znak — palitźniavolenyja. Fota: Tut.by
Struktura pazicyjanuje siabie jak pradstaŭničy orhan biełaruskaha hramadstva.
U žniŭni 2021 hoda byŭ uviedzieny instytut pradstaŭnictva pa vaśmi napramkach: biznes, kultura, sučasnyja technałohii, sport, hramadzianskaja supolnaść, uschodniaje partniorstva, palityčnyja źniavolenyja i jurysprudencyja.
Rašeńnie ab rearhanizacyi dziejnaści Kaardynacyjnaj rady było pryniata 9 žniŭnia 2022 hoda na kanfierencyi «Novaja Biełaruś» u Vilni.
«Naša Niva» — bastyjon biełaruščyny
PADTRYMAĆ
Kamientary