Krajaznaŭcy sprabujuć adnavić u Lachavičach kaplicu rodu Rejtanaŭ
Kala 10 hod tamu abvaliłasia adna z apornych kałon kaplicy, a ŭletku 2014 hoda kaplica abrynułasia. Dla adnaŭleńnia abjekta spadčyny vałanciory šukajuć 3000 dalaraŭ na budmateryjały i apłatu pracy kampietentnych budaŭnikoŭ.
Kaplica pabudavana na miescy pachavańnia adnaho z pradstaŭnikoŭ Rejtanaŭ na Lachaviččynie. Rodavych pachavalniaŭ Rejtanaŭ da siońniašniaha času zachavałasia try: kaplica ŭ Hrušaŭcy, u vioscy Usava kala Kapyla i ŭ Lachavičach.
— Na siońniašni čas najbolš paškodžanym źjaŭlajecca lachavicki pomnik, — paviedamiŭ Intex-press Źmicier Jurkievič, lidar art-supołki imia Tadevuša Rejtana i adzin ź inicyjataraŭ aphrejdu.
Pa jaho słovach, kali adna z čatyroch apornych kałon kaplicy nie vytrymała i abrynułasia, siabry supołki Źmicier Jurkievič, Źmicier Krymoŭski, Ihar Havina i Aleh Bałaš uźnieśli nad kapličkaj draŭlanuju achoŭnuju pavieć, kab abaranić jaje ad apadkaŭ, i amal sabrali srodki na materyjały, kab adnavić kałonu. Ale ŭ lipieni 2014 hoda, litaralna za piać dzion da pačatku zapłanavanych prac, usia pabudova abrynułasia na vačach ludziej. U vyniku davoli prostaja zadača pa adnaŭleńni adnoj apory pieratvaryłasia ŭ amal nievyrašalnuju dla kupki entuzijastaŭ prablemu — poŭnuju rekanstrukcyju abjekta.
Niekalki siezonaŭ vałanciory raźbirali zavały, sartyravali cehłu, vyvozili druz i ŭparadkavali miesca pachavańnia. Arhanizatary rekanstrukcyi stvaryli prajekt na placoŭcy talaka.by, dzie źmiaścili płan aphrejdu kaplicy rodu Rejtanaŭ i pieralik usich nieabchodnych budmateryjałaŭ.
— My raźličyli ŭsie materyjały, jakija nam spatrebiacca. Zastajecca niašmat: pačać i skončyć. Ale biez dapamohi ŭ hetaj spravie nam nie abyścisia. Dla adnaŭleńnia kaplicy my šukajem srodki i budaŭnikoŭ-vałancioraŭ, — kaža Źmicier Jurkievič.
Usie achvotnyja dapamahčy ŭ adnaŭleńni kaplicy mohuć źviazacca sa Źmitrom Jurkievičam pa teł. +375 33 3757250 (MTS).
Histaryčnaja daviedka: Kaplica rodu Rejtanaŭ znachodzicca na lachavickich mohiłkach. Heta kaplica — pomnik u styli poźniaha kłasicyzmu, była ŭźviedziena ŭ siaredzinie XIX st. Chto, ź jakoj nahody, kali dakładna, u honar jakoha śviatoha jaje pabudavaŭ, pakul nieviadoma. Ale toje, što jana raźmieščana ŭ centry rodavaha pachavańnia, havoryć ab jaje važnaści. Mietaličny nadhrobak Daminika Rejtana byŭ raźmieščany ŭ kaplicy abo ŭ pačatku XX st., abo i naohuł u časy «raźvitoha sacyjalizmu». Vierahodna, heta zrabili z metaj abaranić jaho ad vandałaŭ.
Kamientary