Жарт ізраільскіх інжынераў выяўлены з дапамогай Google Earth.
Дзякуючы мапам Google стала вядома, што на даху будынка іранскай авіякампаніі Iran Air у аэрапорце Тэгерана зіхціць ізраільскі сімвал — зорка Давыда.
Яе выява выразна бачная з паветра. «Вядома, гэта можа быць кур’ёзнае архітэктурнае супадзенне або аптычны падман. Але ў такое ніхто не хоча верыць», — піша нямецкая газета Die Welt.
Увагу на зорку звярнуў адзін з амерыканскіх карыстальнікаў Google Earth і абнародаваў гэты факт. Улады Ірана патрабуюць выдаліць знак «як мага хутчэй». Гэта ўжо другая зорка Давіда, знойдзеная ў Тэгеране на працягу некалькіх месяцаў — першую выявілі ў жніўні на адным з будынкаў плошчы Рэвалюцыі.
Іранскія СМІ гадаюць, як сімвал краіны, на адрас якой Махмуд Ахмадзінежад рэгулярна скіроўвае свае філіпікі, апынуўся на будынку аэрапорта і заставаўся незаўважаным на працягу дзесяцігоддзяў. Адказ на першае пытанне, мяркуе газета, можа быць просты: аэрапорт будавалі яшчэ да Ісламскай рэвалюцыі 1979 года ізраільскія інжынеры. Тады, за шахам Махамедам Рэза Пехлеві, адносіны між Іранам і Ізраілем былі сяброўскімі.
Так што, цалкам магчыма, што ізраільскія інжынеры дазволілі сабе тады невялікі жарт. «Шкада толькі, што сённяшні ўрад Ірана, падобна, не мае пачуцця гумару», — падсумоўвае выданне.
Цяпер чытаюць
Былога міліцыянера асудзілі за жаданне ваяваць у Палку Каліноўскага. Пагражала да 15 гадоў калоніі15
Каментары