Магілёў: Улада паабяцала дапамагаць беларускамоўнаму школьніцтву пры ўмове
Пры ўмове, што ініцыятыва будзе сыходзіць ад бацькоў.
Спрыяць адкрыццю беларускамоўных класаў у Магілёве абяцае мясцовая ўлада. Намеснік старшыні гарвыканкама Ігар Шардыка абумовіў, аднак, пазіцыю гарадской вертыкалі ў гэтым пытанні наяўнасцю адпаведных ініцыятыў з боку бацькоў.
Паводле чыноўніка, беларуская мова ў Магілёве запатрабаваная.
Шардыка: «На пачатку гэтага навучальнага года ў горадзе не было ніводнага класа з беларускай мовай навучання. З’явіўся попыт бацькоў, і адкрыўся беларускамоўны клас. Пры наяўнасці ахвотных і ў наступным годзе будзе разглядацца пытанне аб магчымасці існавання такіх класаў.
Улада зацікаўленая ў вырашэнні гэтага пытання».
У адзінай беларускамоўнай класе першай магілёўскай школы вучыцца трое дзетак. Іх бацькі занятыя пошукамі ахвотных вучыцца ў гэтым класе. Яны самі расклейваюць абвесткі, даюць рэкламу ў газеты і на тэлебачанне. Неўзабаве пачнуць хадзіць па школах і распаўсюджваць буклеты з запрашэннем у беларускамоўны клас. Выказванне чыноўніка ўсцешыла бацькоў. Цяпер, кажа маці адной з вучаніц Надзея Салаўёва, у нас з’явілася магчымасць звярнуцца да канкрэтнага чыноўніка з нашымі клопатамі.
***
Ігар Шардыка займае пасаду намесніка старшыні гарвыканкама са жніўня 2010 года. Раней ён працаваў у Магілёўскім дзяржаўным універсітэце імя Куляшова. У гарвыканкаме ён курыруе пытанні ідэалогіі, адукацыі, культуры. Ён кандыдат гістарычных навук.
Пастар Грэм на «Чыжоўка-арэне» папрасіў маліцца за Лукашэнку і Пуціна. А сам маліўся за Трампа55
Каментары