Як і дзе купіць і прадаць золата ў Беларусі, і ці трэба плаціць падаткі за гэта

Высакародныя металы вярнулі сабе бляск і славу, нібы мы жывём у Сярэднявеччы: рост іх кошту апярэджвае нават самыя смелыя прагнозы, піша «Точка». 

Так, з пачатку 2025 года і да піку, які здарыўся 20 кастрычніка, золата падаражэла на біржах на 66,5% — да $4398 за унцыю.

Потым рушыла карэкцыя цэн, інакш кажучы, золата ўпала ў цане. Але ў пачатку лістапада кошт металу на нью-ёркскай таварнай біржы COMEX ізноў пайшоў угору, перасягнуўшы ўзровень $4100. А ў пачатку снежня ён дасягнуў адзнакі $4245.

Як мяркуюць аналітыкі Deutsche Bank, у 2026‑м золата вырасце да $4450 за унцыю, у 2027‑м — да $5150.

Такое імклівае павышэнне цаны адбываецца таму, што ва ўмовах бесперапынных геапалітычных і эканамічных рызык яно застаецца актывам — «прытулкам» для цэнтральных банкаў і інвестараў ва ўсім свеце.

Прычым уверх ідзе кошт не толькі золата, але і іншых высакародных металаў.

Так, срэбра за 2025‑ы вырасла ўдвая (у лістападзе — да $57,86 за унцыю), а плаціна — больш чым на 70% (да $1650 за ўнцыю).

Па золата — у банк

Беларусы маюць права свабодна купляць і прадаваць каштоўныя металы. Але не з рук, а праз канкрэтныя дзяржаўныя і камерцыйныя структуры па іх прэйскурантах.

Так, каштоўныя металы ў вырабах і ломе ў беларусаў набывае Мінфін, аднак гэта менавіта скупка «ў адзін бок».

Купляць, каб затым прадаваць золата, срэбра і плаціну, зарабляючы на розніцы цэн, можна праз беларускія банкі.

Золата ў гэтых фінарганізацыях мае адну і тую ж найвышэйшую, 999-ю, пробу і выкладзенае «на вітрыне» ў выглядзе мерных зліткаў і інвестыцыйных манет.

Дарэчы, з 20 кастрычніка аперацыі ў куплі-продажы каштоўных металаў аднавіў і Нацбанк.

І грамам, і кілаграмам

Мерныя зліткі золата бываюць вагой ад 1 грама да 1 кілаграма. Нядзіўна, што іх кошт адрозніваецца ў разы.

Напрыклад, у Нацбанку цана самага маленькага злітка золата цяпер складае Br446,79, а самага вялікага — Br404 050,40. Тады як прэйскуранты на куплю — Br384,62 і Br384 624,90 адпаведна.

Цэны на куплю-продаж золата адрозніваюцца ва ўсіх фінансавых арганізацыях.

Так, пяціграмовы злітак Беларусбанк купляе за Br2125, а прадае за Br2150, Белаграпрамбанк — за Br2135 і Br2150, Белгазпрамбанк — за Br2120 і Br2150 адпаведна.

Паколькі розніца паміж купляй і продажам каштоўных металаў у банкаў можа быць вельмі істотнай, толькі ўстойлівы (і важкі) рост цэн золата на знешніх рынках можа забяспечыць важкі прыбытак уладальніку злітка альбо манеты.

У прынцыпе, золата добрае менавіта як доўгатэрміновы фінансавы актыў. Але ўкладваць усе рэсурсы ў яго няправільна — разумная частка каштоўных металаў у партфелі інвестара, з розных ацэнак, складае ад 10 да 20%.

Таксама трэба памятаць, што золата перажывае перыяды не толькі ўздыму, але і спаду ў цане.

Акрамя куплі каштоўных металаў у фізічным выглядзе, беларусы могуць набываць іх шляхам адкрыцця так званых металічных рахункаў у банках.

Што з падаткамі на куплю і продаж золата

На падставе пункта 43 артыкула 208 Падатковага кодэкса Беларусі даходы фізасоб ад рэалізацыі каштоўных металаў у выглядзе банкаўскіх і мерных зліткаў, манет, каштоўных камянёў Нацбанку і банкам Беларусі вызваляюцца ад падаходнага падатку.

Выдаткі, панесеныя грамадзянамі на набыццё каштоўных металаў у беларускіх банкаў, у адпаведнасці з пунктам 1 артыкула 196 ПК аб'ектам падаткаабкладання падаходным падаткам таксама не прызнаюцца.

Што да выплаты ПДВ, то гэты падатак у нашай краіне плацяць арганізацыі, растлумачылі Tochka.by у МПЗ.

Фізасобы не прызнаюцца плацельшчыкамі ПДВ пры рэалізацыі тавараў на тэрыторыі Беларусі. Адпаведна, пры правядзенні аперацый куплі-продажу з каштоўнымі металамі праз беларускія банкі падатковых абавязацельстваў па ПДВ у грамадзян таксама не ўзнікае.

• 0
• 0
• 0
• 0
• 0
• 0
• 0
• 0