Пратэстоўцы прымусілі Безаса перанесці вяселле далей ад цэнтра Венецыі

Пратэстоўцы ў Венецыі кажуць, што атрымалі «вялікую перамогу» ў змаганні з амерыканскім мільярдэрам Джэфам Безасам пасля таго, як таму прыйшлося змяніць свае вясельныя планы і перанесці асноўнае святочнае мерапрыемства з цэнтра ў іншае месца, піша Бі-бі-сі.

Дзе менавіта пройдзе — і як будзе перамяшчацца — трохдзённая вечарынка з нагоды шлюбу аднаго з самых багатых людзей планеты з тэлевядучай Лорэн Санчэс, афіцыйна не раскрывалася.

Але меркавалася, што ўрачыстасці павінны завяршыцца ў суботу ў раскошным сярэднявечным будынку Scuola Grande della Misericordia.

Цяпер жа супрацоўнік гарадской мэрыі пацвердзіў BBC, што госці Безаса і Санчэс збяруцца ў будынку Венецыянскага Арсенала — не менш раскошным, але далей ад цэнтра. Актывісты святкуюць, нават нягледзячы на тое, што ў мэрыі патрабаванні пратэстоўцаў назвалі смешнымі.

«Мы вельмі гэтым ганарымся! Мы — ніхто, у нас няма грошай, нічога! — заявіў BBC Тамаза Качары з групы, якая называе сябе No Space for Bezos («Няма месца для Безаса»). — Мы проста грамадзяне, якія самі арганізаваліся, знізу — а ў выніку нам удалося выгнаць з горада аднаго з самых уплывовых людзей у свеце — і ўсіх яго мільярдэраў».

Святкаванні пачнуцца ў канцы гэтага тыдня, і спіс гасцей на іх сапраўды зорны. Паводле чутак, у спісе запрошаных ёсць і Кім Кардаш'ян, і Мік Джагер, і Леанарда Дзі Капрыа — і гэта не кажучы ўжо пра некалькі членаў сям’і Трампа.

Чакаецца, што аэрапорт Венецыі будзе запоўнены прыватнымі самалётамі, а гавань — яхтамі. Для гасцей поўнасцю выкуплены нумары ў пяці гатэлях, і ёсць звесткі, што для забеспячэння бяспекі прысутных у ахову набіраюць былых марпехаў ЗША.

Настолькі маштабнае мерапрыемства выклікала рэзкае незадавальненне з боку самых розных груп: ад мясцовых жыхароў, што змагаюцца з перапоўненасцю Венецыі турыстамі, да актывістаў па барацьбе з кліматычнымі зменамі і тых, хто выступае супраць падтрымкі Безасам Дональда Трампа.

Акрамя плакатаў «No Space for Bezos», расклееных па ўсім горадзе апошнія дні, пратэстныя банеры развесілі нават на мастах над каналамі.

У панядзелак актывісты з групы, якая называе сябе «Усе ненавідзяць Ілана», разгарнулі гіганцкую выяву Безаса на плошчы Сан-Марка, пратэстуючы супраць звышбагатых людзей пад лозунгам: «Калі вы можаце сабе дазволіць арандаваць Венецыю для свайго вяселля, вы дакладна маглі б плаціць больш падаткаў».

«Мы выступаем не супраць самога вяселля як такога, а супраць таго, што яно сімвалізуе, — расказала BBC актывістка Greenpeace Сімона Абата. — Гэта не проста святкаванне шлюбу двух людзей, гэта напышлівая дэманстрацыя ладу жыцця, які зусім нежыццяздольны. Самыя багатыя жывуць у раскошы, у той час як іншыя пакутуюць ад наступстваў кліматычнай надзвычайнай сітуацыі, да стварэння якой яны не маюць ніякага дачынення».

Актывісты падвергліся жорсткай крытыцы з боку чыноўнікаў мэрыі. Там сцвярджаюць, што такія заможныя госці з’яўляюцца найважнейшай крыніцай даходу гарадской казны.

«Гэтыя пратэстоўцы паводзяць сябе так, быццам Венецыя ім належыць, але гэта не так, — заявіў BBC дарадца мэра Венецыі па эканамічным развіцці Сімонэ Вентурыні. — Ніхто не можа забараніць каму-небудзь тут ажаніцца».

Ён сказаў, што пратэсныя групы з’яўляюцца «мізэрнай меншасцю» і не прадстаўляюць думку ўсіх жыхароў горада.

«У гэтым мерапрыемстве прымуць удзел усяго 200 старанна адабраных гасцей, і яно прынясе гораду значную эканамічную выгаду», — заўважыў чыноўнік, дадаўшы, што ўсе мерапрыемствы будуць праводзіцца на прыватных пляцоўках.

Праблема залішняга турызму ў Венецыі стаіць востра, як і ва ўсёй Паўднёвай Еўропе, дзе, па словах пратэстоўцаў, турысты выцясняюць з маляўнічага горада мясцовых жыхароў. Кліматычныя змены таксама падвяргаюць гэты горад на вадзе сур’ёзнай рызыцы затаплення.

Мясцовыя ўлады ўвялі турыстычны падатак у памеры пяці еўра ў дзень за ўезд у горад, але актывісты кажуць, што яшчэ ніводнага турыста гэты падатак не спыніў.

Паколькі першыя госці на вяселле павінны былі прыбыць у чацвер, некаторыя актывісты планавалі скочыць у каналы побач з ключавымі пляцоўкамі разам з надзіманымі алігатарамі. Такім чынам яны хацелі стаць на шляху багатых і знакамітых, сапсаваць ім свята і данесці сваю пазіцыю.

Гэты мокры пратэст быў адменены, але No Space for Bezos усё яшчэ плануе ў канцы гэтага тыдня выказаць свае пачуцці шляхам праекцыі на гарадскі будынак, а ў суботу ўвечары яны заклікаюць людзей далучыцца да шэсця, якое стане заключнай акцыяй пратэсту.

«Безас прыязджае ў Венецыю толькі дзеля вечарынкі, у гэтым праблема: гэта бачанне Венецыі ўжо не як горада, а як вялікага тэматычнага парку, які вы можаце арандаваць часткамі або цалкам для сваіх асабістых патрэб», — сказаў Тамаза Качары.

«Ён пасылае сігнал, што ўвесь горад — гэта фон для вечарынкі мільярдэраў», — дадаў Качары.

• 0
• 0
• 0
• 1
• 0
• 0
• 0
• 0