Двое непаўналетніх хлопцаў уступілі ў канфлікт з незнаёмым мужчынам. Пацярпеламу было нанесена не менш за 154 удараў, у вельмі цяжкім стане яго забралі ў бальніцу. У выніку ў дачыненні да прыяцеляў заведзеная крымінальная справа.
У ноч здарэння падазраваныя выпівалі — падставай быў дзень нараджэння сябра, пішуць Мінск-Навіны. Пасля заканчэння свята прыяцелі пайшлі дадому да знаёмага. З пад'езда ў гэты момант выйшаў мужчына (пазней высветліцца, што ён праводзіў дадому калегу пасля карпаратыву), які выпадкова закрануў аднаго з хлопцаў плячом, што і стала прычынай слоўнага канфлікту.
Пасля гэтага хлопцы папрасілі ў незнаёмца закурыць, але на просьбу атрымалі адмову. Мужчына накіраваўся да таксі, але прыяцелі яго дагналі, схапілі за капюшон і адцягнулі. Затым адзін з падазраваных нанёс удар, ён жа папрасіў кіроўцу таксі адмяніць заказ. Той спачатку адмовіў, але потым усё ж з'ехаў.
Пасля гэтага мужчыну збілі. У нейкі момант ён паспрабаваў схавацца ў пад'ездзе, але зрабіць гэта яму не ўдалося, і збіццё працягнулася. Па заключэнні экспертаў, мінчуку нанеслі не менш за 154 удараў рукамі і нагамі па галаве і целе, затым падазраваныя сышлі.
Пацярпелага каля ліфта выявіла мясцовая жыхарка, яна ж выклікала хуткую. У вельмі цяжкім стане 44-гадовага мужчыну забралі ў бальніцу, нейкі час ён правёў у рэанімацыі.
Падазраваных удалося затрымаць, у дачыненні да іх распачалі крымінальную справу. Удакладняецца, што абодва ў момант здарэння былі непаўналетнімі (цяпер ім 17 і 18 гадоў).
Абвінавачаныя — навучэнцы сталічных каледжаў, раней да крымінальнай адказнасці не прыцягваліся, але адзін з іх знаходзіўся на ўліку ў інспекцыі па справах непаўналетніх, паколькі быў абвінавачаны ў супрацьпраўных паводзінах, — распавёў Мінск-Навінам намеснік пракурора Фрунзенскага раёна Андрэй Сярбун.
— Ім выстаўленае абвінавачванне ў наўмысным прычыненні цяжкага цялеснага пашкоджання, гэта значыць пашкоджання, небяспечнага для жыцця, якое пацягнула за сабой страту зроку, псіхічнае расстройства (захворванне); якое выявілася ў незгладжальным знявечанні асобы; якое носіць характар пакуты або катавання; здзейсненым групай асоб з хуліганскіх памкненняў (п. 3, 7, 9 ч.2 арт. 147 КК).
Адзін з фігурантаў цалкам прызнаў віну. Яго сябра ад дачы паказанняў адмовіўся, сваё дачыненне да інкрымінаванага злачынства адмаўляе.
Цяпер чытаюць
Славацкі палітолаг, былы кіраўнік амерыканскага фонду PACT лабіруе збліжэнне з Лукашэнкам3
Каментары
А таксіст быў сведкам і з’ехаў! Спужаўся непаўналетніх, пакуль сядзеў у машыне?
Проста словаў няма!