31 сакавіка праваабаронца Алег Волчак падаў пазоў б абароне гонару і годнасці ў дачыненні да газеты «СБ — Беларусь сегодня» ў суд Савецкага раёна Мінска.
А.Волчак патрабуе абвяржэння інфармацыі, прыведзенай у артыкуле пад назвай «Много у нас диковин, каждый чудак — Бетховен» у нумары «СБ» за 6 сакавіка 2009 года.
Артыкул напісаны ў форме фельетона і распавядае пра беларускіх праваабаронцаў. Апрача Волчака ў ім фігуруе праваабаронца з Салігорска Яна Палякова, якая скончыла жыццё самагубствам у ноч на 7 сакавіка.
У матэрыяле, у прыватнасці, апісаны інцыдэнт, які адбыўся з А.Волчакам восенню 2003 года.«Удзельнік дробязнай прыдарожнай валтузні — не падзяліў парковачнае месца! — праваабаронца Алег Волчак рухава аббегаў рэдакцыі мінскіх газет з горкай скаргай, што на яго, сярод белага дня, на скрыжаванні (!), напалі супрацоўнікі спецслужбаў (!!), узброеныя кастэтамі (!!!), і што гэта была, без сумнення, помста за яго вельмі праваабарончую дзейнасць (!!!!)», — сцвярджае аўтар артыкула Ксенафонт Суперфасфатаў.
«Сапраўды, — пацвярджае Волчак, — 24 верасня 2003 года невядомы мне грамадзянін у адказ на мае заўвагі аб тым, што ён стварыў аварыйную сітуацыю, прымусіўшы мяне выехаць на сустрэчную паласу, нанёс мне два мэтанакіраваныя ўдары ў твар. У руцэ грамадзяніна быў металічны прадмет. Ад другога ўдару я ўхіліўся. Той, хто нападаў, парваў мне пінжак і пакінуў месца злачынства. Я выклікаў міліцыю і хуткую дапамогу і звярнуўся ва УУС Савецкага раёна Мінска з заявай аб прыцягненні да адказнасці вінаватага».
Пры гэтым А.Волчак падкрэслівае, што ў яго заяве аб распачынанні крымінальнай справы не было ні слова пра тое, што абвінавачаны з’яўляецца супрацоўнікам спецслужбаў і што яго дзеянні — помста за праваабарончую дзейнасць.
«Такім чынам, па віне адказчыка было не толькі дапушчана скажэнне фактаў, гэта было зроблена ў зневажальнай для мяне форме», — лічыць праваабаронца.
А.Волчак патрабуе абвяржэння апублікаваных у газеце звестак і спагнання з рэдакцыі газеты «СБ — Беларусь сегодня» грашовай кампенсацыі за маральны ўрон у 70 млн. рублёў.
Пры гэтым, зазначае ісцец, у рэдакцыі яму заявілі, што Ксенафонт Суперфасфатаў у штаце газеты не працуе. «Няма такога чалавека і сярод пазаштатных супрацоўнікаў газеты, з чаго я дапускаю, што гэта псеўданім кагосьці са штатных супрацоўнікаў газеты», — лічыць Волчак.
Пастар Грэм на «Чыжоўка-арэне» папрасіў маліцца за Лукашэнку і Пуціна. А сам маліўся за Трампа55
Каментары