1. Калі запланаваная дэнамінацыя?
Паводле прэзідэнцкага ўказа, новыя грошы трапяць у абарот 1 ліпеня 2016 года.
2. Хто збяднее, а хто пабагацее пры дэнамінацыі?
Захаваецца статус-кво. Гэта не сумнавядомая рэформа Паўлава, мяняць банкноты на новыя можна без абмежаванняў.
3. Колькі нулёў адкінецца?
Цяперашнія 10 тысяч рублёў стануць 1 новым рублём. То бок адкідваецца ажно чатыры нулі! Такая радыкальная рэформа патрабуе з’яўлення дробных грошай, імі стануць даўно забытыя капейкі. 1 новы рубель будзе роўны 100 капейкам. У тэксце ўказа няма канкрэтнай фразы пра тое, што капейкі будуць чаканіцца ў выглядзе манет. Аднак паколькі прадугледжваецца падзел грошай на рублі/капейкі, відавочна, што адрозненне мусіць быць і ў спосабе вытворчасці. Такім чынам, Беларусь страціць статус апошняй у Еўропе краіны, якая не выкарыстоўвае манеты.
4. Колькі можна будзе разлічвацца старымі грашыма?
Для Беларусі гэта будзе ўжо трэцяя дэнамінацыя, таму схема замены грошай адпрацаваная. На працягу паўгода (з 1 ліпеня 2016 да 31 снежня 2016) можна будзе разлічыцца ў любой краме і старымі, і новымі банкнотамі. Адпаведна будзе ўказвацца і дзве цаны.
Наступныя тры гады (2017—2019) старыя банкноты можна будзе абмяняць у банках, а ў 2020—2021 – у Нацбанку.
5. Навошта патрэбная дэнамінацыя?
Цэны ў Беларусі раслі так хутка, што кожны жыхар краіны стаў мільянерам. Гэта нязручна, а яшчэ і смешна для турыстаў. Таму дэнамінацыя спросціць разлікі і ўспрыманне цэнаў.
Аднак анансаванне дэнамінацыі менавіта цяпер, перад інаўгурацыяй — перадусім піяр-ход. Гэта яшчэ і заява на новы эканамічны курс. Дэнамінацыя была патрэбная ўжо даўно, але інфляцыйны шлях развіцця эканомікі не дазваляў Пракаповічу і Ермаковай нават заікацца пра адкідванне нулёў. Цяпер жа каманда Нацбанка дэкларуе галоўнай мэтай не нарошчванне ВУП, а стабілізацыю інфляцыі, хаця б да ўзроўню ніжэй за 10%.
Цяпер чытаюць
Фядута рэзка адказаў Калеснікавай: За што вы змагаліся ў 2020 годзе, не цікавіць нікога, акрамя мядзведзяў з берлінскага заапарка, якія вас атачаюць3535
Каментары