Tramp: ZŠA pavinny vałodać Hrenłandyjaj, kab nie dapuścić jaje zachopu Rasijaj i Kitajem

Prezident ZŠA Donald Tramp skazaŭ, što Złučanym Štatam nieabchodna «mieć ułasnaść» na Hrenłandyju, kab praduchilić sproby Rasii i Kitaja ŭstalavać nad joj kantrol, paviedamlaje Bi-bi-si.

«Krainy pavinny vałodać terytoryjami i abaraniać svaju ŭłasnaść, a nie arendu. I nam daviadziecca abaraniać Hrenłandyju», — zajaviŭ Tramp žurnalistam u piatnicu, adkazvajučy na pytańnie BBC.

Pavodle jaho słoŭ, heta možna zrabić «lohkim šlacham» abo «ciažkim šlacham». Niadaŭna Bieły dom paviedamiŭ, što administracyja razhladaje mahčymaść nabyćcia paŭaŭtanomnaj terytoryi, jakaja naležyć sajuźniku pa NATA — Danii, ale nie vyklučaje i varyjantu jaje anieksii siłaj.

Danija i Hrenłandyja zajaŭlajuć, što terytoryja nie pradajecca. Danija taksama papiaredziła, što vajennyja dziejańni aznačali b kaniec transatłantyčnaha abaronnaha sajuza. Niahledziačy na toje, što Hrenłandyja — samaja małanasielenaja terytoryja, jaje raźmiaščeńnie pamiž Paŭnočnaj Amierykaj i Arktykaj robić jaje zručnaj dla sistem rańniaha papiaredžańnia ŭ vypadku rakietnych udaraŭ, a taksama dla manitorynhu sudnaŭ u rehijonie.

Prezident ZŠA nieadnarazova zajaŭlaŭ, što Hrenłandyja maje žyćciova važnaje značeńnie dla nacyjanalnaj biaśpieki ZŠA, śćviardžajučy biez dokazaŭ, što jana «ŭsia zapoŭnienaja rasijskimi i kitajskimi karablami».

ZŠA ŭžo majuć bolš za 100 vajskoŭcaŭ, pastajanna raźmieščanych na bazie Pitufik na paŭnočnym zachadzie Hrenłandyi — abjekcie, jaki Złučanyja Štaty vykarystoŭvajuć z časoŭ Druhoj suśvietnaj vajny.

Pavodle dziejučych damoŭlenaściaŭ z Danijaj, ZŠA majuć prava raźmiaščać u Hrenłandyi stolki vojskaŭ, kolki paličać patrebnym.

Adnak, vystupajučy pierad žurnalistami ŭ Vašynhtonie, Tramp zajaviŭ, što arendnaje pahadnieńnie — niedastatkovaja forma.

«Krainy nie mohuć zaklučać damovy na dzieviać hadoŭ ci navat na sto hadoŭ», — skazaŭ jon, dadaŭšy, što jany pavinny mieć ułasnaść.

«Ja lublu narod Kitaja. Ja lublu narod Rasii, — skazaŭ Tramp. — Ale ja nie chaču, kab jany byli maimi susiedziami ŭ Hrenłandyi. Hetaha nie budzie».

«I, darečy, NATA pavinna heta zrazumieć», — dadaŭ prezident ZŠA.

Sajuźniki Danii pa NATA — viadučyja jeŭrapiejskija krainy, a taksama Kanada — na hetym tydni vykazali joj padtrymku, padkreśliŭšy, što «tolki Danija i Hrenłandyja mohuć vyrašać pytańni, jakija datyčacca ich uzajemaadnosin».

Padkreślivajučy, što jany hetak ža, jak i ZŠA, zacikaŭlenyja ŭ biaśpiecy Arktyki, jany zajavili, što heta pavinna dasiahacca sajuźnikami, u tym liku ZŠA, «kalektyŭna».

Jany taksama zaklikali da «zachavańnia pryncypaŭ Statuta AAN, uklučajučy suvierenitet, terytaryjalnuju cełasnaść i niedatykalnaść miežaŭ».

• 0
• 0
• 1
• 3
• 1
• 0
• 0
• 0