Pamierła dziajačka biełaruskaj staroj emihracyi Ludmiła Bakunovič

2 žniŭnia ŭ štacie Dełaver u ZŠA pamierła biełaruska, što niekali listavałasia z Łarysaj Hienijuš, Ludmiła Bakunovič, paviedamiła ŭ svaim fejsbuku daśledčyca biełaruskaj emihracyi Natalla Hardzijenka.

Ludmiła naradziłasia ŭ 1938 hodzie ŭ Miry ŭ siamji doktara Viktara Vojtanki. Jaje baćka padčas niamieckaj akupacyi pracavaŭ u Baranavičach, vykładaŭ u miedyčnaj škole. U Słonimie ŭ łazarecie zamianiŭ doktara Janku Hienijuša, jaki viarnuŭsia sa svajoj biełaruskaj kamandziroŭki ŭ Prahu.

Ludmiła razam ź dziedam i babulaju, baćkami i bratami ŭ 1944 hodzie vyjechała na emihracyi, a ŭ 1948 h. — da svajakoŭ maci ŭ ZŠA. Pasialilisia ŭ štacie Ńju-Džerzi. Dzied — pravasłaŭny śviatar Ściapan Vojtanka byŭ pieršym śviatarom ŭ biełaruskaj carkvie ŭ Hajłend-Parku. 

U 1960 hodzie Ludmiła Vojtanka skončyła Douglas College, dzie vyvučała bijałohiju i chimiju. Chacieła vučycca na miedyka, ale ŭ ZŠA było składana pastupić, i dziaŭčyna pajechała ŭ Luvenski ŭniviersitet u Bielhii, dzie tady byli j inšyja biełarusy. Praŭda, z navučańniem nie skłałasia praz słaboje viedańnie francuzskaj movy.

Zatoje ŭ Luvenie Ludmiła znajšła sabie muža — paznajomiłasia z praŭnukam udzielnika paŭstaninia Kastusia Kalinoŭskaha, Uładzimiram Bakunovičam.

 Ludmiła i Uładzimir ažanilisia, u 1962 h. u ich naradziłasia pieršaja dačka Natalla. A ŭ nastupnym hodzie jany pierabralisia ŭžo razam u ZŠA. Pieršapačatkova žyli z baćkami Ludmiły ŭ Ńju-Džersi, paźniej pierajechali ŭ Detrojt. U siamji naradzilisia piaciora dziaciej. 

Pa-za vychavańniem dziaciej i pracaj školnaj nastaŭnicy Ludmiła Bakunovič była aktyŭnaj udzielnicaj biełaruskaha žyćcia. U Detrojcie była adnoj z zasnavalnikaŭ biełaruskaj carkvy Sv. Ducha, vyśviačać jakuju pryjazdžaŭ jejny dzied Ściapan Vajtanka.

Paśla śmierci muža u 1992 hodzie i vychadu na piensiju Ludmiła viarnułasia ŭ Ńju-Džerszi, dzie žyła adna z dačok. Jana zrabiłasia aktyŭnaj prychadžankaj carkvy Žyrovickaj Božaj Maci BAPC u Hajłend-Parku. Toj samaj, dzie słužyŭ jejny dzied, a potym i jejny baćka, što taksama pad kaniec žyćcia vyśviaciŭsia na śviatara. Ludmiła była staršyńkaju siastryctva, niaspynnaj arhanizatarkaj carkoŭnych mierapryjemstvaŭ, pačastunkaŭ. 

Na pačatku 1990-ch jana pryjazdžała ŭ Biełaruś, u 1993 hodzie była ŭdzielnicaj Pieršaha Źjezda biełarusaŭ śvietu. 

U apošnija hady žyćcia Ludmiła Bakunovič dapamahała svaim dzieciam dahladać ŭnukaŭ, jakich ahułam u jaje było dvanaccać. Žyła ŭ dački Safii ŭ štacie Dełaver. 

Listavańnie z Łarysaj Hienijuš, mahčyma, pačałosia ź inicyjatyvy baćki — Viktara Vojtanki, što byŭ kaleham i znajomym ź Jankam Hienijušam. Adnak pisała sama Ludmiła. Ciopłyja siamiejnyja listy išli z abodvuch bakoŭ akijanu ad 1969 da 1973 hodu. Pieravažna jany byli vydrukavanyja ŭ almanachu «Asoba i čas» (№3, 2010).

• 0
• 0
• 0
• 0
• 0
• 11
• 0
• 0