U jakija krainy dla biełarusaŭ najbolš darahija turystyčnyja vizy? Lidar niečakany
Biełarusam, jakija płanujuć padarožžy, varta viedać, što košt atrymańnia turystyčnaj vizy ŭ roznyja krainy moža istotna adroźnivacca. Prytym niekatoryja dziaržavy vystaŭlajuć vielmi vysokija zbory, a časam viza moža abyścisia daražej za kvitok tudy. Telehram-kanał dla padarožnikaŭ «Sobiraj riukzak» skłaŭ rejtynh ź dziesiaci krain, u jakich atrymańnie turystyčnaj vizy dla biełarusaŭ abychodzicca najbolš doraha.
Na dziasiatym miescy apynułasia Aŭstralija — kab pajechać u hetuju dalokuju krainu, treba zapłacić za vizu 131 dołar ZŠA.
Dalej idzie Kanada — ahulny košt vizy dla biełarusaŭ składaje 135 dołaraŭ. Hetaja suma ŭklučaje jak sam vizavy zbor (73 dołary), tak i apłatu za bijamietryčnyja danyja (62 dołary), jakija źjaŭlajucca abaviazkovymi dla biełaruskich hramadzian.
Na siomym i vośmym miescach — afrykanskija krainy Čad i Lesota. U abiedźviuch krainach viza kaštuje pa 150 dołaraŭ.
Vialikabrytanija zajmaje šostaje miesca z koštam vizy kala 171 dołara. Heta adna z samych papularnych krain u jeŭrapiejskim turyźmie, ale dostup da jaje niaprosty i niatanny.
Piataje miesca ŭ afrykanskaha Kamieruna — tut viza abydziecca ŭžo ŭ 180 dołaraŭ.
A voś Złučanyja Štaty Amieryki zaniali čaćviortuju pazicyju z koštam vizy 185 dołaraŭ. Pry hetym z kastryčnika 2025 hoda zapłanavana pavieličeńnie vizavych zboraŭ — mahčyma, bolš čym na 250 dołaraŭ.
Treciaje miesca ŭ rejtynhu zaniała nievialikaja azijackaja kraina Butan. Z adnaho boku, sama viza tam kaštuje tolki 40 dołaraŭ, ale ŭsio nie tak prosta: kožny turyst pavinien jašče dadatkova zapłacić padatak na ŭstojlivaje raźvićcio (Sustainable Development Fee) — 100 dołaraŭ u dzień na darosłaha i 50 — na dzicia. U vyniku pajezdka na ŭsiaho dźvie nočy moža abyścisia minimum u 240 dołaraŭ tolki za dazvoł na ŭjezd.
Na druhim miescy — Novaja Ziełandyja. Košt turystyčnaj vizy tudy składaje prykładna 264 dołary, što robić jaje adnoj z samych darahich dla biełarusaŭ.
Ale biezumoŭny «čempijon» — Demakratyčnaja Respublika Konha. Tut biełarusu daviadziecca zapłacić cełych 300 dołaraŭ za vizu. Heta samaja vysokaja suma ŭ śpisie i pakazčyk taho, što niekatoryja turystyčnyja kirunki patrabujuć surjoznych finansavych vydatkaŭ jašče da pačatku padarožža.
Takim čynam, pierad tym jak vybirać krainu dla adpačynku, varta časam uličvać nie tolki canu kvitkoŭ i pražyćcia, ale i kolki budzie kaštavać prava tudy ŭjechać.
Hiermanija prypyniła vydaču humanitarnych viz. Ich atrymlivali i biełarusy
«Čakaju aficyjnych prabačeńniaŭ». U biełaruski zhareŭ adpačynak u Pakistanie z‑za pamyłki ŭ vizie
Biełarusam z 11-miesiačnym dziciom nie dali palacieć na Kipr pa polskim prajaznym dakumiencie. Dačapilisia da dziciaci
Siamja ź Biełarusi na svajoj mašynie prajechała kala 10 tysiač kiłamietraŭ dziela Ehiejskaha mora
Ciapier čytajuć
Lehiendarnaja žurnalistka Luboŭ Łuniova raskazała pra Viktara Łukašenku i adnakurśnikaŭ, stvareńnie «Viasny» i palityčny bamond17
Kamientary