Biełaruska kaža, što ŭ Polščy jaje źbiŭ były dobraachvotnik i siabar KR Alaksandr Kamisaraŭ. Toj admaŭlaje

Karyna Paciomkina — biełaruska, jakaja źjechała ad represij va Ukrainu, apynułasia ŭ 2022-m u Bučy i vałancioryła tam, a ŭrešcie pierabrałasia ŭ Polšču.

Na svajoj staroncy ŭ fejsbuku jana raskazała historyju hvałtu, ź jakim sutyknułasia. Padpisčykam Karyna patłumačyła, što jaje źbiŭ Alaksandr Kamisaraŭ — były dobraachvotnik, jaki ciapier źjaŭlajecca siabram Kaardynacyjnaj rady

«Naša Niva» raspytała ŭ joj padrabiaźniej, što adbyłosia:

«Tak stałasia, što z Alaksandram Kamisaravym my žyli ŭ adnoj kvatery ŭ roznych pakojach.

Ź miesiac tamu, ja skazała što budu šukać sabie asobnaje žyllo. Paśla ja paraniłasia i trapiła na čatyry dni na apieracyju ŭ špital. Kali pryjechała ŭ hetuju kvateru, viarnuŭsia dadomu Kamisaraŭ — jon niedzie piŭ sutki. I chacieŭ źmianić mnie paviazku.

Ja admoviłasia, bo jon pjany. My stali svarycca. Jon pačaŭ uryvacca ŭ pakoj, dzie ja była, złamaŭ ručku ŭ dźviarach i staŭ mianie ciahać za škirku. Ja patelefanavała svajoj siabroŭcy, bo nie viedała kamu bolš, a siłavikoŭ ja dahetul panična bajusia. 

Maja siabroŭka čuła častku, z taho što adbyvałasia — što jon byŭ pjany, što pahražaŭ zarezać luboha, chto pryjdzie ŭ kvateru, kab dapamahčy mnie. Zatym jon mianie biŭ pa hałavie i kazaŭ tolki adnu frazu: «Pašču svaju zakryješ?»

Niejak z horam papałam ja vyprasiła, kab jon vyjšaŭ z pakoja, a ja mahła sabrać rečy. Ale zrazumieła, što praz čatyry dni paśla apieracyi nie zmahu ničoha sama sabrać. Potym prysłuchałasia, što Kamisaraŭ zasnuŭ, ale ŭsio roŭna pabajałasia kamu-niebudź patelefanavać. Napisała post u fejsbuk, i adrazu adhuknuŭsia znajomy, skazaŭ, što pryjedzie i pačakaje, kali ja vyjdu z kvatery.

U toj viečar ja pajechała da siabroŭ. Na zaŭtra ź imi ž viarnułasia i zabrała rečy, a jašče praź dzień zabrała kata. Klučy ad kvatery ja zasunuła pad dźviery.

Pavialičyć

Nakolki mnie viadoma, Kamisaraŭ raskazvaje, byccam palcam mianie nie čapaŭ. I tym bolš ni ŭ jakich strukturach nie chočuć padymać pytańnie ab hetym, bo ličać, što heta bytavucha i što niama dokazaŭ. Ale ja padała zajavu ŭ palicyju.

Žachliviej za ŭsio, što mnie zaraz prychodzicca dakazvać, što ja heta nie prydumała ci zdureła i ad niejkaj asabistaj kryŭdy vyrašyła abhavaryć čałavieka. Bo niama vykliku ŭ palicyju, značyć, maŭlaŭ, ničoha nie było. Treba było vyklikać, kab jon mianie zarezaŭ za heta nažom, o tady b była sprava, praŭda što! Trup i Saška Kamisaraŭ. I pakul jaho bratki buduć pakryvać jaho i jaho ŭčynki, jano niekali tak adbudziecca. Ja prapanuju zapluščyć vočy i pačakać, kab potym plasnuć u dałoni i skazać: «Jaki žach, nie viedajem, jak tak adbyłosia».

Usie viedajuć, što jon taki. Kali ja patelefanavała adnoj sa svaich znajomych, jakaja viedaje i Alaksandra, to jana adrazu skazała, što viedała, jaki jon čałaviek i vieryć kožnamu majmu słovu. Bo viedaje inšyja historyi, kali Saška Kamisaraŭ biŭ byłuju žonku. Ale ja, dziakuj Bohu, nie jaho žonka i nie źbirajusia mirycca z hetym».

Pavialičyć

Alaksandr Kamisaraŭ raskazaŭ «Našaj Nivie», što nie choča publična kamientavać hetuju spravu. Z abvinavačańniami jon niazhodny i adznačyŭ, što hatovy dać pakazańni ŭ palicyi, kali heta spatrebicca.

«Žadaju spadaryni Karynie pośpiechaŭ. A ludziam, jakija jaje atačajuć, siłaŭ dy ciarpieńnia», — padsumavaŭ Alaksandr.

Alaksandr Kamisaraŭ naradziŭsia ŭ 1989 hodzie ŭ Barysavie. Pracavaŭ na pradpryjemstvach u rodnym horadzie i ŭ Žodzina. U 2020—2021 byŭ šeść raz zatrymany pa artykule 23.34, adsiedzieŭ 66 sutak aryštu. U 2021 źjechaŭ ź Biełarusi. Ź lutaha pa listapad 2023 hoda byŭ u składzie Pałka Kalinoŭskaha. Ciapier žyvie ŭ Polščy. Delehat Kaardynacyjnaj rady ad błoku «Niezaležnyja biełarusy».

• 4
• 2
• 7
• 29
• 3
• 4
• 6
• 0