Muža pieršaha vice-mera Minska sfatahrafavali sa śviežaj hazietaj, kab dakazać, što infarmacyja pra jaho aryšt — fejk. Niepierakanaŭča — voś čamu

Pavodle našaj infarmacyi, niekalki miesiacaŭ tamu Sachno trapiŭ u SIZA. Pryčyna nieviadomaja — mahčyma, pa abvinavačvańni ŭ karupcyi (pasadu kiraŭnika ŭ «Biełfarmpramie» Sachno ŭžo nie zajmaje). Prychodzili i da Łazarevič, ale ci jaje zatrymlivali — nieviadoma, a, kali i tak, jaje zatrymańnie, imavierna, nie doŭžyłasia bolš za try dni. Paśla hetaha čynoŭnica viarnułasia na pracu.

Siłavyja viedamstvy nie paviedamlali pra toje, što da pary ŭźnikli niejkija pretenzii — ale heta typovaja źjava ŭ siońniašniaj Biełarusi. Vielmi časta pra aryšty top-čynoŭnikaŭ abviaščajecca, tolki kali sprava dachodzić da suda. Naprykład, pra toje, što kolišni pamočnik Ihar Bryło znachodzicca za kratami, dziaržaŭnyja ŚMI tak i nie paviedamili — choć jaho aryšt adbyŭsia ŭžo hod tamu.

(Bryło dziaržśmi zhadvali tolki ŭskosna. Na naradzie ŭ červieni Łukašenka kazaŭ: «Pra Bryło šmat čuli. Nie budu nahadvać i paŭtarać. Pryciahnutyja na siońnia try dziasiatki čałaviek»).

U jakaści abviaržeńnia infarmacyi «NN» prapahandysty apublikavali zdymak Nadziei Łazarevič i Aleha Sachno, jakija pazirujuć sa śviežym numaram «SB. Biełaruś siehodnia» ŭ rukach. Pryčym Sachno nazvany «namieśnikam hiendyrektara pryvatnaha pradpryjemstva».

«Fota zroblena tolki što: sužency Łazarevič i Sachno ŭ kabiniecie z hazietaj za 15 listapada 2024 hoda», — napisali ŭ dziasiatkach prałukašenkaŭskich telehram-kanałaŭ.

Na zdymku sapraŭdy jany. Ale što heta za kabiniet? Pa interjery paznać składana. Možna ŭbačyć lijany, ułaścivyja pryjomnym čynoŭnikaŭ, a taksama adlustravańnie kvadratnaj lampy aśviatleńnia z naciažnoj stoli.

Z ulikam taho, što ŭ Łazarevič siońnia pracoŭny dzień, možna vykazać zdahadku, što Sachno pryjechaŭ (ci jaho pryvieźli?) na pracu da žonki.

Vyhlad u Sachno niezvyčajny. U adroźnieńnie ad žonki, jon zusim nie ŭśmichajecca, siadzić, utaropiŭšysia ŭ hazietu. Zrešty, čas u źniavoleńni moža adbicca na čałavieku pa-roznamu.

Admietna, što telehram-akaŭnt Sachno pa-raniejšamu afłajn — z 19 červienia 2024 hoda. Ci moža być, što muža top-čynoŭnicy ciapier ci raniej pieraviali pad chatni aryšt z zabaronaj karystacca internetam i kamunikavać ź ludźmi? Całkam mahčyma.

Dla znajomych Sachno publikacyja jaho fota stała ździŭleńniem. Jany nie čuli pra jaho vyzvaleńnie — kali jano nasamreč adbyłosia. 

Ci abviarhaje zdymak toj fakt, što Sachno znachodziŭsia za kratami? I nie paćviardžaje, i nie abviarhaje.

My pa-raniejšamu ŭpeŭnienyja ŭ infarmacyi ad svaich krynic. My razumiejem, što jany ryzykujuć, dzielačysia važnymi źviestkami z hramadstvam. Isnuje ryzyka pamyłak, bo infarmacyju praviarać składana. Adnak u praŭdzivaści mienavita hetaj historyi my całkam upeŭnienyja. Sachno aryštoŭvali.

• 18
• 0
• 29
• 6
• 1
• 1
• 0
• 0