Aficyjny Minsk vykarystaŭ hiendyrektara MAHATE ŭ čarhovaj kambinacyi, a toj vyrašaŭ svaje prafiesijnyja zadačy.
Vizit hiendyrektara MAHATE Rafaela Hrosi staŭ hałoŭnaj temaj aficyjnych ŚMI.
U časy, kali aficyjny Minsk staŭ šeraj zonaj dla vialikich mižnarodnych vizitaŭ, a parohi Pałaca niezaležnaści abivajuć u asnoŭnym rasijskija hubiernatary, hiendyrektar MAHATE staŭ dla Alaksandra Łukašenki žadanym hościem.
U Minsku Hrosi čakała aŭdyjencyja ŭ Pałacy Niezaležnaści, u Astravieckim rajonie jaho pasłužliva sustrakali hubiernatar Karanik i vice-premjer Karankievič. A taksama natoŭp rabotnikaŭ aficyjnych ŚMI, hatovych zapisać i raspaŭsiudzić słovy Hrosi. Mała krain, dzie hiendyrektaru MAHATE nastolki radyja.
Dyrektar MAHATE ŭsich prysutnych nie padvioŭ i adrapartavaŭ: «Apieracyjnyja pracy, što prachodziać na stancyi, całkam adpaviadajuć mižnarodnym normam». I dadaŭ: «Ja pierakanaŭsia, što tam vykonvajucca abaviazacielstvy pa biaśpiečnaj i nadziejnaj ekspłuatacyi».
Za hadzinu Hrosi ničoha istotnaha pravieryć i acanić nie moh. Biaśpieku AES kampietentnaja aceńvać kamisija MAHATE, jakuju ŭ Biełarusi čakajuć paźniej. Tym bolš, što zaŭvahi ŭ minułaj spravazdačy byli. Ale ŭ cełym MAHATE — heta łabist atamnaj enierhietyki, ad jaje nielha čakać krytyčnych acenak u cełym. U svoj čas ekśpierty MAHATE byli schilnyja navat minimizavać nastupstvy Čarnobyla.
Hrosi nie pryvykać jeździć pa krainach z aŭtarytarnymi i navat tatalitarnymi palityčnymi režymami. Jon jeździć usiudy, dzie jość jadziernaja enierhietyka — ci to Iran, ci zachoplenaja rasiejcami Zaparožskaja AES. Jaho nie čakajuć chiba što ŭ KNDR, jakaja z MAHATE daŭno vyjšła, kab nichto nie pieraškadžaŭ pracavać nad jadziernaj zbrojaj.
Łukašenka pakul na takoje nie advažyŭsia. Naadvarot, jon vykarystaŭ vizit Hrosi dla svajoj palityčnaj prapahandy.
«Vy heta bačycie ŭ Litvie: im karcić nie tolki ad našaj atamnaj stancyi, ale i naohuł u suviazi z tym, što adbyvajecca ŭ našaj Biełarusi», — paskardziŭsia Łukašenka Hrosi.
BiełAES była kamieniem spatyknieńnia jašče da 2020-ha. I prablema atamnaj stancyi, pabudavanaj faktyčna pad Vilniaj, nikudy nie padziełasia. Litva pieryjadyčna publična skardzicca, što Minsk, nasupierak praviłam, nie trymaje jaje ŭ kursie taho, što adbyvajecca ŭ Astraŭcy, vykazvaje sumnieńni ŭ biaśpiecy stancyi. I prosić MAHATE niešta z hetym zrabić.
Niadaŭna kiraŭnik MZS Ryžankoŭ vybuchnuŭ daŭno źbitymi prapahandysckimi štampami ŭ artykule ab adnosinach ź Litvoj. Łukašenka hetuju hulniu praciahvaje.
Kambinacyja razyhrana biez aktyŭnaha ŭdziełu samoha Hrosi — Łukašenka prosta karystajecca momantam. Tamu padyhryvać palityku z krainy z adnoj atamnaj stancyjaj niama nijakaj racyi. Arhiencinca sapraŭdy turbuje jadziernaja biaśpieka ŭ rehijonie, dzie adrazu dźvie bujnyja AES znachodziacca ŭ zonie bajavych dziejańniaŭ.
Davoli dziŭnym momantam sustrečy stała inšaje vykazvańnie Łukašenki. Jon raptam, biez usialakaj na toje nahody, zahavaryŭ pra Čarnobylskuju stancyju. I zajaviŭ: ni ŭ Minska, ni ŭ Maskvy niama płanaŭ jaje zachoplivać, pra što nibyta pišuć niejkija ŭkrainskija ŚMI.
«Ja vas absalutna zapeŭnivaju, što heta hłupstva poŭnaje, jakoje mianie navat ździviła. My ŭ strašnym śnie navat nie mahli ŭjavić, što nam daviadziecca zachapić Čarnobylskuju atamnuju stancyju i za jaje potym adkazvać», — adkazvaŭ Łukašenka na pytańnie, jakoje Hrosi navat nie zadavaŭ.
Nasamreč, hetyja słovy raźličany na ludziej z karotkaj pamiaćciu. U pieršy ž dzień uvarvańnia 24 lutaha 2022 hoda rasijskija vajskoŭcy zajšli z terytoryi Biełarusi, zachapili ČAES i ŭtrymlivali jaje krychu bolš za miesiac.
Novaja zhadka pra Čarnobyl, u vyniku, dadała napružańnia, a nie źniziła jaho.
Ciapier čytajuć
Palitviazień raskazaŭ, jak zvyčajnyja kryminalniki abjavili haładoŭku, kab palepšyć umovy ŭtrymańnia palityčnych3
Kamientary