Para choča sabrać 10 tysiač dalaraŭ z padpisčykaŭ u instahramie na viasielle mary
Novy trend u sacyjalnych sietkach: biełarusy prosiać padpisčykaŭ u instahramie daryć im hrašovyja pieravody na dzień naradžeńnia. A adna para navat sprabuje sabrać na ŭłasnaje viasielle 10 tysiač dalaraŭ. Pahladzieli, kolki ž pieraličvajuć u takich vypadkach.
Dla niekatorych biełaruskich błohieraŭ užo stała zvyčajnaj źjavaj namiakać, što jany čakajuć hrašovyja padarunki da niejkaj važnaj dla ich daty.
Naprykład, błohierka (a ŭ minułym seks-koŭč) Alena Miełavackaja, śviatkujučy viasielle na Paŭnočnym Kipry, vyrašyła źbirać hrošy na «chłopčyka-dziaŭčynku» nie tolki afłajn, ale i anłajn: lubaja padpisčyca Aleny mahła pieravieści niekatoruju sumu za toj ci inšy varyjant (SMM-śpiecyjalistka rehularna publikavała spasyłki na apłatu ŭ storys). Vyniki hrašovaha hałasavańnia ŭ anłajnie atrymalisia takija: 4750 rubloŭ pieraličyli na dziaŭčynku i 2190 rubloŭ — na chłopčyka.
Nie zaŭsiody takija prapanovy pastupajuć ad błohieraŭ, jakija majuć šmattysiačnuju aŭdytoryju — na ekśpierymient časam vyrašajucca i ludzi ź niekalkimi tysiačami padpisčykaŭ. Kolki ž realna atrymać u takim vypadku?
Niadaŭna adna ź biełaruskich błohierak, jakaja žyvie ŭ rajonnym centry i maje kala 4 tysiač padpisčykaŭ u instahramie, napisała ŭ storys: «Heta ekśpierymient dla tych, chto choča mianie pavinšavać. Heta budzie padarunak ad vas. Naprykancy dnia ja pakažu, jakaja suma naźbirałasia i što možna na jaje nabyć». Dziaŭčyna padkreśliła, što možna dasłać navat 1 rubiel. A atrymaŭšy pieršyja dva pieravody hrošaj, dadała jašče i rekvizity kartki, na jakuju možna pieraličvać hrošy ź luboha miesca śvietu.
Uviečary błohierka raspaviała, što atrymała ŭ padarunak kala 220 rubloŭ. Na hetyja hrošy jana nabyła srebny branzalet.
Ale adna biełaruska pajšła jašče dalej i vyrašyła sabrać hrošy na šykoŭnaje viasielle, da jakoha zastałosia kala dvuch miesiacaŭ. Alina i Jaŭhien majuć u instahramie ahułam kala 19 tysiač padpisčykaŭ. Para taksama viadzie nievialiki biznes — trymaje fotastudyju i šoŭrum viačernich sukienak.
Zakachanyja pačali płanavać viasielle ŭ 2022 hodzie — za 10 miesiacaŭ da zapłanavanaj daty śviata. Jany hladzieli šykoŭnyja placoŭki dla praviadzieńnia viasiella, abirali fatohrafa, a niaviesta rašała, jakuju sukienku sabie pašyć. Chutka stała zrazumieła, što na heta patrebna prykładna dva vahony hrošaj, jakich maładyja ludzi nie mieli, ale spadziavalisia nazapasić. Ale ž nie atrymałasia, i viasielle pryjšłosia adkłaści na žnivień 2024 hoda.
U niejki momant Jaŭhien sprabavaŭ pierakanać kachanuju, što lepiej pajechać na paŭhoda žyć na Bali, a ad pafasnaha śviata admovicca. Niaviesta ž kateharyčna admoviłasia. Jaje hałoŭny arhumient byŭ taki: na vodpusk jany jašče paśpiejuć zarabić, a viasielle raz u žyćci.
Sioleta ŭ krasaviku Alina znoŭ pačała zapisvać sumnyja storys: «Praz čatyry miesiacy ŭ nas viasielle, a ŭ skarboncy 26 dalaraŭ. Kožny raz my załazim u skarbonku, kab to studyju apłacić, to rekłamu, to jašče niešta. I zdajecca, što zarobki byccam nie maleńkija, ale pry hetym nie atrymlivajecca adkłaści ad słova zusim. Jak ludzi na kvatery źbirajuć, u mianie ŭvohule ŭ hałavie nie ŭkładajecca».
Alina pryznałasia, što praz heta ŭ ich pary było niamała svarak i niervovych zryvaŭ. I voś narešcie za 73 dni da viasiella para prydumała, adkul uziać na jaho finansy. Jany zapisali videa, u jakim paprasili ŭsich nieabyjakavych ludziej paŭdzielničać u apłacie śviata. Navat asobnuju kartku zaviali śpiecyjalna dla terminovaha zboru.
«Vy tolki ŭjavicie, kali 10 tysiač čałaviek dašle nam usiaho pa 1 dalary. Tady my zmožam lohka ździejśnić svaju maru. A kali bolš… Ujavicie, jaki heta kruty ekśpierymient — pahladzieć, jakoje viasielle možna zrabić dziakujučy padpisčykam», — z entuzijazmam kaža Alina ŭ ryłsie.
Videa zavirusiłasia ŭ instahramie i vyklikała chvalu chejtu. Nie ŭsie zrazumieli, jak možna terminova źbirać hrošy na viasielle, kali isnuje šmat zboraŭ na lačeńnie dziaciej. Ale ž pieršy dzień ekśpierymientu pakazaŭ, što ideja Aliny i Jaŭhiena niebieznadziejnaja — im zadanacili 162 rubli.
Para była pryjemna ŭražana i padziakavała chejtaram, jakija svaimi aburanymi kamientaryjami dapamahli prasunuć videa.
«U Biełarusi abyšłosia b daražej». Błohierka adśviatkavała viasielle na Paŭnočnym Kipry i raspaviała, kolki heta kaštuje
Biełaruscy na viasielle padaryli 123-hadovuju vialikuju załatuju manietu. Viedajecie, kolki jana kaštuje ciapier?
U Mazyry niaviesta apłaciła štraf prosta na viasielli hrašyma, jakija padaryli hości
Pamiatajecie biełaruskuju aficyjantku, jakaja stała žonkaj šejcha z Dubaja? Voś jak skłałasia žyćcio hierojaŭ hetaj kazki
«U pašparcie babuli staić data naradžeńnia 00.00.1945» — «A ŭ majoj XX.XX.1940». Jak takoje moža być?2
Kamientary