«Rasijanie jechać pierastali, a ŭ našych niama stolki hrošaj». Što adbyvajecca na aŭtamabilnym rynku Biełarusi
Za apošnija niekalki miesiacaŭ u biełaruskim aŭtamabilnym biznesie adbyŭsia šerah źmien, jakija nie mahli nie adbicca na prodažach.
Niestabilnaja viasna 2024-ha
Spačatku rynak skałychnuła navina pra toje, što z 1 krasavika 2024 hoda rasijanie bolš nie zmohuć, jak raniej rehistravać u siabie aŭtamabili ź Biełarusi, razmytnienyja pa lhotnym taryfie biez dapłaty 50% roźnicy.
Ad 1 krasavika pačali dziejničać abnoŭlenyja staŭki ŭtylizacyjnaha zboru, jakija hałoŭnym čynam zakranuli impart hruzavych aŭto.
U dadatak da źmien u zakanadaŭstvie Rasii i Biełarusi, krainy ES pačali bolš pilna sačyć za vykanańniem sankcyj u dačynieńni da Rasii, uvozić ź Jeŭrasajuza ŭ Biełaruś aŭtamabili z abjomam ruchavika bolšym za 1,9 litra stała składaniej. Aficyjnyja dylery na hetym fonie prahnazujuć rost prodažaŭ novych mašyn.
Pieršaja navina spravakavała pavyšany popyt na aŭto. Pradaŭcy tady kazali, što na rynku nazirałasia sapraŭdnaje ažyŭleńnie praz uzrosły popyt z boku rasijan.
Patrabujuć źnižku ŭ 3-5 tysiač dalaraŭ
Ciapier na rynku zacišša. Surazmoŭca, jakija maje ŭ prodažy try śviežapryhnanyja ź Jeŭropy aŭtamabili, kaža, što ciaham apošnich dvuch miesiacaŭ intares da jahonych mašyn amal nulavy.
«Za tydzień moža być 1-2 pustyja vykliki, pa vynikach jakich nie dachodzić navat da ahladu aŭto. Što tyčycca rasijan, to apošni raz davodziłasia mieć ź imi spravu ŭ siaredzinie sakavika», — zhadvaje pierahonščyk.
Pa słovach mužčyny, rasijanie, jakija dahetul cikaviacca aŭto, zvyčajna prapanoŭvajuć canu adrazu na niekalki tysiač mienšuju ad ukazanaj u abjavie.
«Ja na ich navat nie reahuju, bo heta vidavočna niejkija chitrazroblenyja pierakupy z Rasii, jakija z chodu prapanujuć na 3-5 tysiač mienš. Mahčyma, jany takim čynam namahajucca znajści tych, kamu chutka patrebnyja hrošy, a mašyna nie pradajecca. Inakš ich łohiku zrazumieć składana, bo prapanavać 15 tysiač za mašynu, jakaja kaštuje 19-20, heta poŭnaja biazhłuździca», — tłumačyć pierahonščyk.
Kali rasijanie nie jeduć u Biełaruś pa mašyny, to mašyny jeduć da rasijan
Inšy surazmoŭca taksama skardzicca, što prodažy apošnim časam amal nijakija. Raspradać mašyny jamu ŭdałosia tolki paśla taho, jak ich pieravieźli niepasredna ŭ Rasiju.
«Paśla taho, jak mašyny zaviśli ŭ Biełarusi, my vyrašyli pasprabavać pradać ich u Rasii z dapamohaj našych partnioraŭ, jakija kuplajuć mašyny ź Jeŭropy. Jak rasijanie adhulali majskaja, to ŭ ich tam prodažy adnavilisia, i nam udałosia pradać niekalki mašyn», — kaža surazmoŭca.
Ułaśnik aŭtakamisa taksama adznačyŭ, što apošnija dva miesiacy prodažy nijakija.
«Rasijanie jechać pierastali, a ŭ našych niama stolki hrošaj. Kali jašče ŭ pačatku hoda dobra pradavalisia śviežyja aŭto ź Jeŭropy, to ciapier znoŭ samyja papularnyja — heta «karčy» za 5-7 tysiač.
Siarod śviežapryhnanych biaruć tolki mašyny ŭ dyjapazonie 13-18 tysiač. Usie, što daražejšaje za dvaccatku, praktyčna staić kołam».
Pradaŭcoŭ stała bolš, čym pakupnikoŭ
Mužčyna vykazvaje mierkavańnie, što
aŭtabiznesu varta pieražyć ciažki čas, kab jon zmoh ačyścicca ad vypadkovych ludziej, jakija nikoli ŭ žyćci nie zajmalisia mašynami, ale vyrašyli ŭkłaścisia ŭ ich, bo na hetym možna było dobra zarabić, pakul isnavaŭ pavyšany popyt.
«Biez stabilnaha popytu z boku rasijan biełaruski rynak nie taki ŭžo i vialiki, tamu nam prosta nie treba stolki pradaŭcoŭ. Byli časy, kali bolš za pałovu kupcoŭ byli z RF, ciapier, kali ich amal nie zastałosia, rynak pieranasyciŭsia.
Žadajučych pryhaniać mašyny na pieraprodaž ź Jeŭropy abo ZŠA stała bolš, čym hatovych ich kuplać», — upeŭnieny ŭłaśnik aŭtakamisa, jaki ŭžo kala 20 hadoŭ zajmajecca prodažam patrymanych aŭto.
Jašče adzin surazmoŭca, jakija zajmajecca aŭtamabilami sa Štataŭ, hladzić na budučyniu krychu bolš aptymistyčna, čym jahonyja kalehi.
Jon miarkuje, što niahledziačy na toje, što aŭtamabili ciapier pradajucca sapraŭdy drenna, rynak musić ažyvicca.
«Reč u tym, što rasijanie pierad 1 krasavika nabrali mašyn u zapas, tamu treba pačakać, pakul jany ich raspradaduć. U dadatak da hetaha, niama adzinaha mierkavańnia ŭ pytańniach dapłaty mytu, kali mašyna razmytniena ŭ Biełarusi na lhotnika.
Adnyja kažuć, što treba, a inšyja, što nie. Nakolki ja zrazumieŭ, to jašče hod razmytnienyja praź Biełaruś mašyny možna budzie ŭvozić u Rasiju biez dadatkovych dapłat», — kaža surazmoŭca.
Mužčyna śćviardžaje, što ŭ mai pradaŭ adnu mašynu rasijanam, jakija ŭžo nie pieršy raz kuplali praź jaho aŭto sa Štataŭ.
«Jany byli hatovyja nabyć mašynu, pakul jana jašče była ŭ darozie. Ale potym admovilisia praz aściarohi z dapłatami. Niedzie praź miesiac znoŭ źjavilisia, kali mašyna była ŭžo ŭ ramoncie. U vyniku jany jaje ŭsio adno zabrali, tolki nie ŭ avaryjnym stanie, jak spačatku płanavali, a ŭžo adramantavanuju».
Pry hetym surazmoŭca pryznaŭsia, što cikavaści da inšych mašyn, jakija ciapier znachodziacca na šlachu ŭ Biełaruś, u ich niama.
Kala 19 tysiač kamier płanujuć ustalavać kala minskich padjezdaŭ. Heta amal u 10 razoŭ bolš, čym ciapier3
Kamientary