Ukrainskija terminały Starlink «raptoŭna vyjšli z ładu», kali Rasija znoŭ uvarvałasia ŭ Charkaŭščynu
Hazieta The Washington Post daviedałasia, što sistema spadarožnikavaha chutkasnaha internetu Starlink ad Iłana Maska, jakoj aktyŭna karystajucca ŭkrainskija vojski, znoŭ pierastała pracavać mienavita ŭ momant paŭtornaha ŭvarvańnia Rasii na poŭnač Charkaŭščyny. Heta «całkam aślapiła ŭkraincaŭ» i istotna dapamahło rasiejcam.
10 maja, u dzień pačatku paŭtornaha rasijskaha ŭvarvańnia ŭ Charkaŭščynu, 125-aja bryhada terabarony Ukrainy, jakaja kožny dzień sačyła z dapamohaj bieśpiłotnikaŭ za naroščvańniem rasijskich sił na tym kirunku, zastałasia bieź videakanałaŭ infarmacyi, i ŭkrainskija vojski byli zaśpiety źnianacku.
The Washington Post śćviardžaje, što heta stała vynikam raptoŭnaha adklučeńnia ŭkrainskich terminałaŭ Starlink u rajonie rasijskaha ŭvarvańnia. Hetuju infarmacyju haziecie paćvierdzili ŭkrainskija vajskoŭcy, u tym liku sa 125-aj bryhady terabarony.
«U niejki momant my zastalisia całkam ślapyja. Heta była samaja vialikaja prablema, my nie bačyli, jak ruchalisia rasijskija vojski, my kantaktavali tolki pa radyjo abo pa telefonach, dzie jany ŭsio jašče pracavali», — raskazaŭ haziecie kamandzir padraździaleńnia dronaŭ raźviedki z pazyŭnym «Artyst».
Pryčyna padobnaha adklučeńnia Starlink dakładna nieviadomaja, jość mierkavańni, što heta mahła być paśpiachovaja elektronnaja ataka z boku Rasii. Adnak usio heta ŭ sukupnaści ź niedastatkova dobraj umacavanaściu ŭkrainskaj linii abarony ŭ zonie rasijskaha praryvu zabiaśpiečyła zachop Rasijaj 138 kvadratnych kiłamietraŭ ukrainskaj terytoryi ŭsiaho za tydzień, adznačaje The Washington Post.
Hazieta taksama zhadvaje vypadki, kali ŭkrainskija terminały Starlink užo adklučalisia padobnym čynam jašče ŭ 2022-23 hadach. Tady suviaź źnikała mienavita ŭ momanty sproby ŭkrainskaj ataki na akupavany Rasijaj Krym (2022) i padčas vialikaha ŭkrainskaha kontrnastupu na ŭschodzie krainy (2023).
Jak paviedamlali niekatoryja suśvietnyja ŚMI, za tymi adklučeńniami moh stajać asabista stvaralnik sistemy Starlink i kiraŭnik kampanii SpaceX miljarder Iłan Mask (sam jon hetuju infarmacyju abviarhaŭ), jaki na praciahu vajny rehularna rabiŭ rezanansnyja zajavy pra simpatyi da Trampa, pavahu da Pucina, biessensoŭnaść NATA i nieabchodnaść pakinuć za Rasijaj akupavanyja joj ukrainskija terytoryi.
Akramia taho, sistemami Starlink, pa infarmacyi ŭkrainskaj vyviedki, aktyŭna karystalisia i rasijskija vojski. Zakuplała hetyja sistemy Rasija ŭ arabskich krain. Iłan Mask u adkaz zajaŭlaŭ, što heta taksama niapraŭda.
Ciapier čytajuć
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich17
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich
«Da lejtenanta pryjechała maładaja žonka, pabačyła, što adbyvajecca ŭ zonie, i zastreliłasia». Vyjšła zaklučnaja častka ŭspaminaŭ Ryhora Biarozkina pra HUŁAH i saviecki Minsk1818
Kamientary
Za im staić Bajden.