«Rasatam» vyjaviŭ zahadkavuju prablemu Astravieckaj AES. A Biełaruś kaža, što katastrofy niama 

Jak pišuć žurnalisty Bloomberg, jany mieli mahčymaść aznajomicca z šeraham unutranych dakumientaŭ «Rasatama». Inžyniery karparacyi, jakija rychtavali druhi reaktar mahutnaściu 1200 miehavat da ŭvodu ŭ ekspłuatacyju na Astravieckaj AES, vyjavili zahadkavuju i nadzvyčaj redkuju prablemu — u pieršy kontur ź sistemy vodapadrychtoŭki prasočvałasia ijonaabmiennaja smała, jakaja ŭjaŭlaje saboju ćviordyja nierastvaralnyja palimiery. Jany abmiežavana nabuchajuć u rastvorach elektralitaŭ i arhaničnych rastvaralnikach. Ijonaabmiennaja smała vykarystoŭvajecca ŭ ciepłaenierhietycy dla źmiakčeńnia i abiassolvańnia vady, ačystki zvarotnych i ściokavych vodaŭ.

Prasočvańnie smały pahražała zaklinić krytyčna važnyja kampanienty. Palimiery mahli zabić kanały ciepłavydzialajučych elemientaŭ i tearetyčna navat vyklikać raspłaŭleńnie aktyŭnaj zony. Z hetaj pryčyny, jak piša vydańnie, 25 lutaha 2022 hoda «Rasatam» časova adkłaŭ zapusk druhoha enerhabłoku.

U vyniku kontur daviałosia raźbirać, čyścić i častkova mianiać, što, vierahodna, abyšłosia ŭ sotni miljonaŭ dołaraŭ. Zatrymka z uvodam zaniała bolš za hod. Tolki ŭ listapadzie druhi enierhabłok byŭ padklučany da sietki.

Pra toje, što vada ŭ pieršym cyrkulacyjnym kontury zabrudžana smołami, litoŭskaja raźviedka paviedamlała jašče ŭ sakaviku hetaha hoda.

Jak piša vydańnie, spasyłajučysia na słovy troch ananimnych inžynieraŭ-jadzierščykaŭ, dobra znajomych z kanstrukcyjami rasijskich reaktaraŭ, pryčyna zabrudžvańnia smałoj zastajecca niavyśvietlenaj. Pavodle ich słoŭ, važna daviedacca, z čym źviazana prablema — z ekspłuatacyjnaj pamyłkaj ci z kanstrukcyjaj sistemy, kab jana nie paŭtaryłasia ŭ inšych miescach, dzie budujucca padobnyja reaktary.

Jak adznačajecca ŭ publikacyi, u atrymanych žurnalistami dakumientach taksama jość źviestki pra toje, što «Rasatam» pry budaŭnictvie Astravieckaj AES sutyknuŭsia ź niedachopam pracoŭnaj siły i prablemami z łancužkami pastavak.

U pryvatnaści, u dakumientach havorycca, što kiraŭniki prajektaŭ na praciahu šerahu hadoŭ prymušali rabočych pracavać z apieradžeńniem praduhledžanych terminaŭ, a taksama skardzilisia na pastajannuju pastaŭku niaspraŭnaha abstalavańnia i zatrymki ŭ pastaŭkach, uklučajučy kłapany i hienieratary. Usio heta, na dumku jeŭrapiejskich čynoŭnikaŭ, moža paŭpłyvać na jadziernuju biaśpieku.

Kiraŭnictva Astravieckaj AES na zapyt Bloomberg ab kamientary nie adkazała.

Adnak namieśnik ministra enierhietyki Biełarusi Michaił Michadziuk adreahavaŭ na publikacyju ahienctva Bloomberg ab mahčymaj niaštatnaj situacyi na BiełAES u 2022 hodzie «sprobaj dyskredytavać stasunki z Rasijaj».

«Čarhovaja sproba dyskredytavać praz hety prajekt, našy dobryja adnosiny z našym starejšym bratam u Rasijskaj Fiederacyi», — zajaviŭ jon.

Michadziuk ličyć, što apanienty vychoplivajuć asobnyja pracoŭnyja momanty: «Niama nijakaj katastrofy. My ni sabie nie vorahi, ni susiednim krainam i razumiejem svaju adkaznaść pierad našymi dziećmi, unukami i pierad budučymi pakaleńniami», — padkreśliŭ jon.

Čytajcie jašče:

Łukašenka nazvaŭ kančatkovaje zakančeńnie budaŭnictva BiełAES padarunkam biełarusam da 7 listapada

BiełAES abyšłasia ŭ 5,36 miljarda dalaraŭ — Minfin RF

Litoŭskaja raźviedka: Biełaruś i «Rasatam» zamoŭčvajuć incydenty na Astravieckaj AES

«Metanakiravanaja akcyja pa dyskredytacyi prajekta». Minenierha admaŭlaje, što ź Biełaruskaj AES niešta nie tak 

• 8
• 0
• 7
• 15
• 6
• 4
• 45
• 0