Vyjšaŭ treci siezon «Zabojstvaŭ u adnym budynku» — detektyva, u jakim źmiešanyja kłasika i sučasnaść. U im źniałasia i Merył Stryp
Dvoje niemaładych i niepaśpiachovych artystaŭ, a ź imi maładaja žančyna rasśledujuć złačynstvy, nie vychodziačy sa šmatpaviarchovika. U jakaści padazravanaha — luby z susiedziaŭ. Akramia taho, trojca lubić tru-krajm padkasty, tamu, rasśledujučy złačynstva, jany rašajuć zapisać pra heta ŭłasnaje šou.
Pieršy siezon detektyŭnaha sitkama «Zabojstvy ŭ adnym budynku» vyjšaŭ u 2021 hodzie. Pa siužecie niaŭdačlivy teatralny režysior Olivier, zabyty akcior Čarlz i dziaŭčyna Mejbł, jakaja zabłytałasia ŭ sabie, žyvuć u hmachu na Manchetenie. Jany «zanadta hultajavatyja, kab kudyści jechać», tamu «biarucca tolki za zabojstvy, što adbylisia ŭ ich domie», zasielenym ekscentryčnymi žycharami.
Trojca taksama zapuskaje pra heta aŭdyjašou (padkasty, pryśviečanyja sapraŭdnym kryminalnym historyjam, — žanr, asabliva papularny ŭ ZŠA, dzie za apošnija šeść hadoŭ vyjšła bolš za 200 takich padkastaŭ). Sieryjał atrymaŭsia paśpiachovym, i dniami vyjšaŭ užo treci siezon. A da akciorskaha składu dałučylisia mnohija zornyja akciory nakštałt trochrazovaj uładalnicy «Oskara» Merył Stryp.
U intervju radyjo KCRW scenaryst Džon Chofman raspavioŭ, što padčas pracy nad sitkamam dla jaho akazaŭsia prydatnym žyćciovy dośvied rasśledavańnia zabojstva. Niekalki hadoŭ tamu Chofman daviedaŭsia, što jaho blizki siabar dziacinstva skončyŭ žyćcio samahubstvam. Scenaryst zachacieŭ razabracca, što ź im zdaryłasia, pajechaŭ u rodny Viskonsin i staŭ sačyć za chodam aficyjnaha rasśledavańnia. Jon taksama paznajomiŭsia z byłoj žonkaj i dziećmi svajho zahinułaha siabra, razmaŭlaŭ ź jaho susiedziami i kalehami, jakija kazali, što ŭ taho nie było pryčyn dla samahubstva. U vyniku palicyja pryjšła da vysnovy, što heta było zabojstva, i złaviła złačyncu.
Jak adznačaje Meduza, šou šmat u čym pabudavana na spałučeńni kłasiki z sučasnaściu. Aŭtary vyrašyli ŭziać dvuch lehiendarnych komikaŭ i źvieści ich z bolš sučasnaj hierainiaj, jakuju hraje Sielena Homies. A humar šmat u čym budujecca na kulturnym razryvie pakaleńniaŭ: piersanažam Šorta i Marcina — za siemdziesiat, hieraini Homies — kala tryccaci.
U pieršym siezonie hieroi nie tolki šukali zabojcu, ale i vyrašali asabistyja prablemy. Čarlz zmahaŭsia z adzinotaj i sprabavaŭ pabudavać pieršyja ramantyčnyja adnosiny za šmat hadoŭ. Olivier, jaki daŭno nie padstupaŭsia da režysury, šukaŭ hrošy na apłatu kvatery — inakš jaho vysielać, — a taksama naładžvaŭ adnosiny z darosłym synam. A Mejbł sprabavała razabracca ź minułym: zabojstva było niepasredna źviazana ź jaje blizkimi. Dla kožnaha zapis padkastu staŭ mahčymaściu vykazać svaje prablemy.
Dziejańnie redka pakidaje ŭtulny šmatpaviarchovik, śledstva viaduć amatary, a siužet napoŭnieny zahadkami i niečakanymi pavarotami. Pry hetym sieryjał padymaje takija aktualnyja temy, jak adzinota haradskich žycharoŭ, ich zaležnaść ad hadžetaŭ i kantentu.
U trecim siezonie bolš dramy i mienš detektyva, ale zatoje jość jaskravaja siužetnaja linija z Merył Stryp.
Padziei pačynajucca z epizodu, jakim zaviaršyŭsia druhi siezon. Režysior Olivier narešcie viarnuŭsia na Bradviej z novaj pastanoŭkaj i paklikaŭ na adnu z rolaŭ svajho siabra Čarlza. Adnak u dzień premjery prosta na scenie pamiraje hałoŭnaja zorka śpiektakla — Ben Hlenroj.
Pad padazreńniem akazvajecca kožny člen trupy. Ben byŭ taksičny, samaŭlubiony, tamu jon nažyŭ šmat vorahaŭ. Aktrysa ciarpieła jaho damahańni, dublor — zavualavanyja rasisckija abrazy. Brat Bena ciahaŭ za akcioram sumki i byŭ achviarnym kazłom za roznyja niaŭdačy zorki. Ale samy vidavočny matyŭ — u niaŭdačlivaj aktrysy, jakoj Olivier daŭ pieršuju važnuju rolu ŭ karjery, ale Ben nieadnarazova patrabavaŭ zvolnić jaje za drennuju ihru.
U cełym krytyki stanoŭča aceńvajuć praciah «Zabojstvaŭ u adnym budynku», choć niechta i adznačaje, što da treciaha siezona sieryjał siabie vyčarpaŭ i jamu bolš ničoha nie zastajecca, akramia jak zaprašać znakamitaściaŭ. Acenki treciaha siezona na sajcie Rotten Tomatoes — 99% ad krytykaŭ i 90% ad hledačoŭ.
Sieryjał vychodzić u aŭtorki na servisie Hulu, 29 žniŭnia źjavicca piaty epizod, usiaho ich — dziesiać.
Bolš pra kino:
Ci sapraŭdy francuzski lidar byŭ monstram? U listapadzie na ekranach — «Napaleon» Rydli Skota
Ciapier čytajuć
Što ŭ realnaści adbyłosia pad Smalavičami? Voś samaja łahičnaja pryčyna nalotu ašalełych rasijskich małaletak3
Kamientary