Vydańnie The New York Times moža całkam «źniščyć» ChatGPT i inšyja niejrasietki
Raskazvajem, jak takoje stała mahčymym.
Vydańnie The New York Times i kampanija OpenAI (raspracoŭščyk suśvietna viadomaj niejrasietki ChatGPT) nieŭzabavie mohuć apynucca ŭ sudzie.
Pryčyna — žadańnie redakcyi The New York Times zabaranić štučnamu intelektu navučacca na artykułach vydańnia, a taksama pieraškodzić jamu parušać aŭtarskija pravy i kapijavać žurnalisckija materyjały.
Pra heta dniami paviedamiŭ bujny partał NPR i inšyja zachodnija miedyja. Raspaviadajem, čamu hety sud moža mieć vielmi surjoznyja nastupstvy nie tolki dla ChatGPT, ale i dla mnohich inšych niejrasietak až da źniščeńnia ich usich.
Jak piša partał NPR sa spasyłkaj na niekalki krynic, blizka znajomych ź situacyjaj, jurysty The New York Times surjozna razhladajuć mahčymaść padać u sud na OpenAI, bo jaje niejrasietka ChatGPT moža vykarystoŭvać vielizarnuju kolkaść aŭtarskaha žurnalisckaha kantentu dla navučańnia i patencyjnaha napisańnia svaich ułasnych artykułaŭ u styli The New York Times.
«Heta moža zrabić štučny intelekt paŭnapraŭnym kankurentam vydańnia i nanieści jamu niepapraŭnuju škodu. Tamu The New York Times niadaŭna abnaviła svaje praviły akazańnia pasłuh i całkam zabaraniła kapijavańnie i analiz svaich materyjałaŭ niejrasietkami. Parušeńnie novych praviłaŭ adkryvaje darohu ŭ sud, jaki moža stać fatalnym dla ChatGPT i inšych niejrasietak», — adznačaje partał NPR.
Sami ž nastupstvy mohuć być takimi: kali žurnalisty The New York Times na patencyjnym sudzie zdolejuć dakazać niezakonny zamach na svaje aŭtarskija pravy i kapijavańnie abo ŭznaŭleńnie svaich repartažaŭ z boku ChatGPT, to kampanija OpenAI budzie vypłačvać sotni tysiač dalaraŭ štrafaŭ za kožny fakt dakazanaha kapijavańnia.
Akramia taho, kampanija budzie vymušanaja ścierci vielizarny masiŭ danych, źviazany sa The New York Times, na jakich vučycca i jakija vykarystoŭvaje niejrasietka ŭ svajoj štodzionnaj pracy.
Ale situacyja moža akazacca jašče horšaj. Pieramoha The New York Times u sudzie moža stać hłabalnym precedentam, za jakim rušyć vielizarnaja kolkaść takich ža pazovaŭ ad mnohich pravaŭładalnikaŭ za kapijavańnie ich kantentu. Heta kali nie źniščyć, to materyjalna spustošyć kampaniju OpenAI, a ChatGPT budzie całkam ściorty.
Hetaja ž historyja adbudziecca i ź inšymi hulcami na rynku štučnaha intelektu, čyje niejrasietki taksama navučajucca na nievyčerpnaj kolkaści aŭtarskich materyjałaŭ miljonaŭ čałaviek i arhanizacyj.
Apisany vyšej varyjant raźvićcia padziej — adzin z najhoršych dla ŭsioj haliny štučnaha intelektu, jaki tolki-tolki padymaje hałavu i zajaŭlaje ab sabie na ŭvieś śviet.
Ale niahledziačy na toje, što nijakaha pazovu i skarhi ad redakcyi The New York Times jašče nie pastupała, samo vydańnie, jak śćviardžajuć krynicy NPR, kateharyčna nie nastrojena iści na lubyja dasudovyja damoŭlenaści i supracoŭnictva z kampanijami-raspracoŭščykami štučnaha intelektu.
Čytajcie jašče:
Sacsietku X (były tvitar) mohuć całkam vydalić z kram Apple i Google
ChatGPT dapisaŭ «Hulniu tronaŭ», čaho sam aŭtar nie zmoh zrabić za 12 hadoŭ
Kamientary