Zabojstva Tatarskaha moža być śviedčańniem unutranaj baraćby ŭ Rasii — ISW
Amierykanski instytut vyvučeńnia vajny (ISW) pryśviaciŭ častku svajoj frantavoj zvodki śmierci rasijskaha vajennaha błohiera Uładlena Tatarskaha, jaki zahinuŭ padčas «tvorčaj sustrečy» ŭ Sankt-Pieciarburhu.
Pa zaklučeńni ekśpiertaŭ ISW, rasijskija čynoŭniki i prapahandysty paśpiašalisia abvinavacić u arhanizacyi vybuchu Ukrainu, choć pradstaŭniki Kijeva adprečyli svajo dačynieńnie da taho, što adbyłosia.
U zvodcy pryvodzicca mierkavańnie zasnavalnika PVK «Vahnier» Jaŭhiena Pryhožyna, jaki 2 krasavika zajaviŭ, što nie staŭ by vinavacić Kijeŭ u śmiarciach Tatarskaha i Darji Duhinaj — dački fiłosafa Alaksandra Duhina, jakaja zahinuła pry vybuchu pad Maskvoj.
ISW nahadvaje, što Tatarski (sapraŭdnaje imia jakoha Maksim Famin) byŭ zabity ŭ kaviarni, jakaja naležyć Pryhožynu. «Zabojstva Famina ŭ bary Pryhožyna, vierahodna, zjaŭlajecca častkaj bolš ahulnaj tendencyi da eskałacyi ŭnutryrasijskich kanfliktaŭ z udziełam Pryhožyna i «Vahniera», — ličać ekśpierty Instytuta.
Na ich dumku, «zabojstva Famina, mahčyma, było papiaredžańniem Pryhožynu, jaki ŭsio bolš staviŭ pad pytańnie hałoŭnyja prapahandysckija tezisy Kramla pra vajnu va Ukrainie i navat tumanna namiakaŭ na svaju cikavaść da pasady rasijskaha prezidenta — albo ŭ jakaści kankurenta Pucinu, albo jak jaho pierajemnik».
«Bijahrafija i pavodziny Famina nahadvajuć samoha Pryhožyna — jany abodva stali viadomymi ultranacyjanalistyčnymi fihurami paśla taho, jak adsiadzieli ŭ turmie», — zaŭvažaje ISW.
Saksama skazana ŭ zvodcy, što rasijskija čynoŭniki, mahčyma, majuć namier vykarystoŭvać zabojstva Famina, kab uzmacnić samacenzuru siarod rasijskaj hramadzianskaj supolnaści, jakija staviać pad pytańnie pośpiechi Rasii na vajnie.
Hetaje zabojstva pahłyblaje raskoł u asiarodździ rasijskich vajskovych błohieraŭ, što moža zhulać na ruku žadańniu Kramla ŭmacavać kantrol nad infarmacyjnaj prastoraj, miarkujuć u ISW.
Ciapier čytajuć
Bolš za 60 čałaviek zatrymanyja paśla kancerta Maksa Karža ŭ Frankfurcie-na-Majnie. Sa sceny śpiavak zaklikaŭ spynić vajnu va Ukrainie7
Kamientary