Łucki: «Žyćcio ŭ krainie praciahvajecca … dziakujučy Alaksandru Ryhoraviču Łukašenku»
«Adna supolnaja meta — vystajać na čarhovym vitku cyvilizacyjnaha kryzisu», — tak nazyvajecca intervju, jakoje daŭ časopisu «Biełaruskaja dumka» namieśnik kiraŭnika łukašenkaŭskaj administracyi Ihar Łucki.
Jakim zapomnicca hod histaryčnaj pamiaci i jakoje značeńnie jon maje dla budučyni Biełarusi, jakija tendencyi skłalisia ŭ 2022-m u infarmacyjnaj palitycy i hramadskim raźvićci, — takija pytańni časopis łukašenkaŭskaj administracyi zadaŭ čałavieku, jaki adkazvaje za ideałahičnuju śfieru, — Iharu Łuckamu.
«Dla Biełarusi adychodziačy 2022-hi byŭ niaprostym, ale vynikovym. Atrymałasia toje, što jašče ŭ pačatku hoda zdavałasia praktyčna niemahčymym», — skazaŭ ideołah.
Sa słoŭ Łuckaha vynikaje, što jon dosyć małavierna aceńvaŭ pierśpiektyvy našaj krainy, adnak realnaść pieraŭzyšła jaho čakańni.
«Z aporaj na padmurak histaryčnaj pamiaci ŭmacavali narodnaje adzinstva ŭnutry krainy. Stali astraŭkom miru i duchoŭnaści va ŭmovach hłabalnaha kryzisu, jaki ŭzmacniajecca», — raźviŭ svaju dumku jon.
Ihar Łucki ŭ karotkim intervju čatyry razy pracytavaŭ i jašče adzin raz uzhadaŭ Alaksandra Łukašenku.
«My pavinny zapomnić: kali my nie voźmiem hałavu ŭ ruki, to ŭ hetym voś ciapierašnim pieradziele śvietu my znoŭ apyniomsia ŭ hetym strašnym palityka-ekanamičnym zamiesie… Kolki b nas ni było — 10—12—20 miljonaŭ, pamierci pavinny, ale zachavać jaje dla svaich dziaciej». Heta toj samy vypadak, kali lidar farmuluje i prostymi słovami danosić da svajho naroda hłyboki sens histaryčnaha momantu», — kaža Łucki.
«Niahledziačy na ŭsie vykliki 2022 hoda, žyćcio ŭ krainie praciahvajecca ŭ zvykłym dla hramadzian rečyščy. I heta najvyšejšaje dasiahnieńnie, jakoje stała mahčymym u pieršuju čarhu dziakujučy kiraŭniku našaj dziaržavy Alaksandru Ryhoraviču Łukašenku», — tłumačyć Łucki.
Kamientary