Rasija źjaŭlajecca klučavym fundataram ultrapravych u Jeŭropie. Havorka pra sotni miljonaŭ dalaraŭ
Raspaviadajem, jak Rasija z 2012 hoda pieratvaryłasia ŭ adnaho z hałoŭnych fundataraŭ krajnie pravych i nieanacystaŭ.
Rasija vielmi šmat kaža pra «denacyfikacyju» Ukrainy. Pry hetym rasijskija aficyjnyja asoby arhanizujuć dziejnaść tych, kaho ŭ Jeŭropie nazyvajuć «fašystami». Heta vyśvietliła daśledavańnie Jeŭrapiejskaha parłamienckaha forumu.
Zhodna z materyjałami daśledavańnia, finansavańnie aktyŭna pačałosia ŭ 2012 hodzie. I z 2012 pa 2018 hady rasijanie vydatkavali bolš za 200 miljonaŭ jeŭra na padtrymku sumnieŭnych inicyjatyŭ u roznych krainach ES. I heta tolki dakazanaja suma.
Śled rasijskich kansiervatyŭnych aliharchaŭ
U 2013-m rasijskija praŭładnyja aliharchi pačali aficyjna finansavać šmatlikija hetak zvanyja «antyhiendarnyja» inicyjatyvy i krajnie pravyja palityčnyja i hramadskija ruchi. U hetym ža hodzie jany vybilisia ŭ top, skłaŭšy kankurencyju fundataram ultrapravych, jakija pachodziać ź ES.
Aficyjnaje finansavańnie źviazanaje najpierš ź imionami dvuch rasijskich aliharchaŭ: Małafiejeva i Jakunina.
Uładzimir Jakunin — były kiraŭnik rasijskaj čyhunki, jaho majomaść aceńvajecca ŭ miljard dalaraŭ. Pasadoviec vielmi blizki da Pucina, jaho navat nazyvali patencyjnym pierajemnikam, a taksama «adnym z hałoŭnych, chto spryjaŭ kansiervatyŭnamu pavarotu Pucina». Zasnavalnik šmatlikich fondaŭ, jakija finansujuć inicyjatyvy, što prasoŭvajuć «ruski śviet» za miažoj.
Kanstancin Małafiejeŭ — viadomy aliharch, jaki zarabiŭ svoj kapitał u «lichija 90-ja» i, pa niekatorych źviestkach, nie samym sumlennym šlacham. Taksama jon vałodaje kanałam «Carhrad», jaki zajmajecca klerykalnaj impierskaj prapahandaj dla ruskamoŭnaj aŭdytoryi. Jon zasnavaŭ niekalki fondaŭ, jakija taksama zajmajucca finansavańniem sumnieŭnych inicyjatyvaŭ.
U źviazcy z Małafiejevym pracuje Alaksiej Komaŭ. Infarmacyi pra jaho niašmat, ale viadoma, što jon udzielničaje ŭ roznych kansiervatyŭnych inicyjatyvach u Rasii, siarod jakich fondy Małafiejeva, a taksama aktyŭna zajmajecca pieramovami z ultrapravymi partyjami ŭ Jeŭropie.
Usich troch abjadnoŭvaje toje, što jany źjaŭlajucca ŭdzielnikami Patryjarchalnaj kamisii pa spravach siamji, abaronie dziacinstva i maciarynstva.
Što praŭda, anieksija Kryma i pačatak pieršaha etapu rasijska-ŭkrainskaj vajny ŭ 2014 hodzie, vidać, parušyli płany Rasii ŭ hetaj śfiery. Prynamsi, mahčymaści adkrytaha finansavańnia praz sankcyi i reputacyjny ŭdar značna źmienšylisia, što i bačna na hrafiku.
Daśledčyki nazyvajuć jašče dźvie krynicy finansavańnia ŭltrapravych, źviazanych z Rasijaj: šeryja hrošy ad fondaŭ, jakija finansujucca ŭradam RF i hetak zvanyja «pralni».
«Pralni»
Heta firmy, stvoranyja łabistamii Rasii dla admyvu hrošaŭ. Da prykładu, adna z takich «pralniaŭ» nazyvajecca NOVAE TERRAE. Heta italjanski palityčny fond, jaki finansuje roznyja ŭltrakansiervatyŭnyja inicyjatyvy. Hety fond razam z arhanizacyjaj L.G.V. S.R.L. atrymali ad fiktyŭnych rasijska-azierbajdžanskich padradčykaŭ 2,4 miljona jeŭra ŭ pieryjad z 2012 pa 2015 hod. U tym liku za łabiravańnie intaresaŭ Rasii, a taksama abialeńnie ŭładaŭ Azierbajdžana. Paśla kiraŭnik fondaŭ Łuka Vałonte byŭ asudžany na čatyry hady turmy za atrymańnie hetych chabaraŭ.
Taksama paviedamlajecca, što Małafiejeŭ dapamoh atrymać 11 miljonaŭ jeŭra na kampaniju krajnie pravaha «Nacyjanalnaha frontu» dla ŭdziełu ŭ vybarach u Jeŭraparłamient. Paśla hetaha «Nacyjanalny front» uzmacniŭ svaju padtrymku Rasii i prasoŭvańnie prarasijskaj palityčnaj paviestki ŭ Francyi i ŭsim ES.
A Jakunin u svaju čarhu jašče ŭ 2011 hodzie tajemna prafinansavaŭ Centrysckuju partyju Estonii i łabiravaŭ prarasijskija inicyjatyvy pa ŭsioj Jeŭropie i navat u ZŠA.
Paśla, užo ŭ 2018-2019 hadach, Rasija prafinansavała italjanskuju pravapapulisckuju partyju Lega na try miljony jeŭra. Pryčym naŭprost praz Hazpram, jaki daŭ źnižku na haz kampanii, źviazanaj z kiraŭnictvam partyi. Lišak hrošaŭ vykarystali jak chabar dla finansavańnia palityčnaj kampanii partyi.
Ahulnaje finansavańnie praz «pralni», jakoje zdoleli dakazać žurnalisty-rasśledvalki, pieravyšaje 16 miljonaŭ jeŭra. Ale jany ličać, što heta tolki viaršynia ajśbierha.
Fondy, jakija finansujucca ŭradam RF
Taksama, pa źviestkach daśledčykaŭ, šerym finansavańniem jeŭrapiejskich palitykaŭ zajmajucca fondy, zasnavanyja čynoŭnikami z Kramla. Nazyvajucca try takija fondy:
- «Rassupracoŭnictva»,
- fond «Ruski mir»,
- Fond Harčakova.
Pa infarmacyi ad Fonda Maršała, jany dali nie mienš za 1,5 miljona jeŭra bolš jak 40 prarasijskim niedziaržaŭnym arhanizacyjam u krainach Bałtyi. Taksama jany zajmajucca łabiravańniem roznych ultrakansiervataraŭ u samim ES.
Jakija vyniki daśledavańnia?
Aficyjna dakazana, što ludzi, źviazanyja z uradam RF, ukłali ŭ jeŭrapiejskich ultrapravych bolš za 200 miljonaŭ jeŭra tolki za piać hod. Fond Maršała vyjaviŭ 115 vypadkaŭ nielehalnaha finansavańnia palityčnych ruchaŭ u Jeŭropie, da bolšaści ź jakich datyčnyja rasijanie.
Taksama ŭltrapravyja ruchi, jakija skieptyčna staviacca da Jeŭrapiejskaha sajuza, musiać, pa zadumach rasijan, parušać adzinstva ŭnutry ES i asłablać jaho.
Daśledčyki adznačajuć, što takoje finansavańnie vielmi vyhadnaje Rasii, bo dazvalaje atrymać puł padkantrolnych palityčnych ruchaŭ unutry ES, jaki zajmaje prarasijskuju pazicyju pa šmatlikich pytańniach.
Kamientary