Na Maršy ŭ niadzielu zatrymali kubinca — jamu pahražaje departacyja
Na Maršy 8 listapada ŭ Minsku zatrymali 55-hadovaha kubinca Raberta Valdesa Kasanuevu. Ranicaj 11 listapada jon usio jašče čakaje suda ŭ minskim IČU na Akreścina. A paśla suda milicyja moža padniać pytańnie ab jaho departacyi.
— U Raberta skončyŭsia vid na žycharstva. Jaho pavinny departavać ź Biełarusi, — raspaviadaje Jeŭraradyjo Iryna, kaleha Raberta.
Amal 30 hadoŭ Kasanueva pražyŭ u našaj krainie. Jon pracuje tut hrafičnym dyzajnieram, svabodna havoryć pa-rusku i aktyŭna vykazvaje svaju hramadzianskuju pazicyju: vystupaje suprać falsifikacyj na biełaruskich vybarach i hvałtu z boku siłavikoŭ. Sa słoŭ kalehaŭ, Raberta vychodziŭ na pratestnyja maršy kožnuju niadzielu. 8 listapada akazałasia fatalnym.
— Siabry, mianie departujuć z krainy. Ułady admovilisia padaŭžać moj vid na žycharstva praz maju palityčnuju pazicyju, — pisaŭ Kasanueva ŭ siaredzinie vieraśnia. — Ja addaŭ hetaj krainie amal 30 hadoŭ, šmat pracavaŭ. U mianie tut zastajucca troje dziaciej: Kłaŭdyja, Kryścijan i Albierta (niepaŭnahadovy).
Ja zrabiŭ tut usio, što moh, vielmi spadziajusia i maru ŭ chutkim časie ŭbačyć Biełaruś z čystym niebam nad hałavoj biez Łukašenki. Ni pra što nie škaduju adnosna majoj pazicyi, i kali spatrebiłasia b rabić heta jašče raz, to rabiŭ by jašče bolš.
Ranicaj 11 listapada siabry Raberta pryjechali da IČU na Akreścina, kab daviedacca, kali adbudziecca sud i kolki jašče jaho płanujuć tut trymać. Pakul što im nie paviedamili nijakaj padrabiaznaj infarmacyi.
Zhodna ź biełaruskim zakanadaŭstvam, čałaviek, u dačynieńni da jakoha ŭžytaja departacyja abo vysyłka, moža być zatrymany na termin, nieabchodny dla vykanańnia pastanovy ab departacyi abo vysyłki. Byli vypadki, kali zamiežniki ŭ čakańni vydvareńnia ź Biełarusi pravodzili ŭ IČU pa paŭhoda — biez suviazi z rodnymi, bieź pieradač, a značyć, bieź nieabchodnaha adzieńnia i srodkaŭ hihijeny.
Źmiaščeńnie zamiežnych hramadzian i asob biez hramadzianstva ŭ IČU pravaabaroncy rasceńvajuć jak žorstkaje abychodžańnie, jakoje prynižaje čałaviečuju hodnaść. Bo izalatary nieprydatnyja dla ŭtrymańnia ludziej praciahły termin.
Ciapier čytajuć
Palčys zajaviŭ, što heta jon kaardynavaŭ pratesty 2020 hoda ź Minska i pisaŭ płany pieršych maršaŭ82
Palčys zajaviŭ, što heta jon kaardynavaŭ pratesty 2020 hoda ź Minska i pisaŭ płany pieršych maršaŭ
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich2121
Kamientary