Biełaruskaje recha kaŭkaskaj vajny

Vybuchovaje raźvićcio padziej na Kaŭkazie moža nadać druhoje dychańnie idealahiemie biełaruskaj stabilnaści, što pablakła paśla vybuchu la steły 4 lipienia. Akramia taho, Miensk moža toje-sioje vyhadać i ŭ torhu z Maskvoj.

Na dumku vajskovaha ahladalnika Alaksandra Alesina,

Biełaruś nia stanie ŭciahvacca ŭ novuju kaŭkaskuju vajnu.

I navat kali Maskva znoŭ zapatrabuje, jak niekali, ustalavać dla hruzinaŭ vizavy režym, nia vyklučana, što biełaruskaje kiraŭnictva znoŭ prapuścić heta mima vušej.

«Apošnim časam u stasunkach z Maskvoj Miensk praktykuje bolšaje dystancyjavańnie i bolšy prahmatyzm», — kaža Alesin. I ŭ źviazku z kanfliktam vakoł Paŭdzionnaj Asiecii Łukašenka naŭrad ci zachoča vyrazna demanstravać satelitnaść, miarkuje ekspert.

Palitolah Andrej Fiodaraŭ taksama ličyć, što Biełaruś ustrymajecca ad niejkaha ŭdziełu ŭ bajavych dziejańniach. Tym bolej što Rasieja tut nia moža apelavać da vykanańnia damovy pra kalektyŭnuju biaśpieku, bo miaciežny anklaŭ nia jość jejnaj terytoryjaj.

Zvyš taho, adznačaje ekspert, dačynieńni Miensku z Tbilisi za apošni čas značna ŭłahodzilisia, u nas adčyniłasia hruzinskaja ambasada. U ajčynnych uładaŭ niama zacikaŭlenaści znoŭ raspalvać žarści ŭ dačynieńni da Hruzii, jak toje było padčas ichniaj kalarovaj revalucyi dy pierad pierad biełaruskimi vybarami-2006 (pamiatajecie: lahiery, bajeviki, dochłyja pacuki...).

Zrešty, rytoryka Mienska ŭ vypadku surjoznaj eskalacyi vajny ŭsio ž budzie, badaj, zbolšaha prarasiejskaj, miarkuje Fiodaraŭ. Jak-nijak, sajuźnicki status abaviazvaje chacia b da verbalnych žestaŭ…

Dadamo: na tle kaŭkaskaj vajny, što stała dla Maskvy praciaham łancuha niepryjemnaściaŭ (plany ZŠA u halinie supraćrakietnaj abarony, nataŭski trend Kijeva)

Miensk atrymlivaje psychalahičny bonus u permanentnym palityčna-ekanamičnym torhu z Kramlom. Kamu ž tady i davać tańniejšy haz, jak nie apošniamu chaŭruśniku, hatovamu lehčy pad tanki ahulnaha voraha?

Što ž da padziej na Kaŭkazie, to padajecca, što ŭ dačynieńni da ich Miensk budzie jak maha dolej vykazavacca ŭ ahulnym planie: hłybokaja zakłapočanaść, zakliki da razvažnaha sensu i ŭsio takoje.

Nie sakret, što za Saakašvili staić Vašynhton. Dyk ci moža biełaruskaje kiraŭnictva ŭ źviazku z apošnimi padziejami na Kaŭkazie atrymać niejkuju padtrymku Maskvy za svoj antyamerykanizm?

Tut usio nia tak prosta. Tak, u hetym kanflikcie Rasieja faktyčna ŭvachodzić u klinč z Amerykaj. Ale mienavita anhažavanaść dźviuch jadziernych dziaržaŭ u hetyja padziei i daje spadzieŭ, što ŭ ichnich stalicach spracuje ćviarozy sens i vajnie nie daduć razharecca.

Pakazalna, što Pucin u Pekinie naŭprost abmianiaŭsia mierkavańniami pra kaŭkaski kanflikt z Bušam. Biełaruski aficyjny lider taksama ŭ kitajskaj stalicy. Ale, sami razumiejecie, u hetym siužecie jon pa-za hulnioj.

ZY. Jak i prahnazavałasia, biełaruski MZS vykazaŭ "hłybokuju zakłapočanaść".

• 0
• 0
• 0
• 0
• 0
• 0
• 0
• 0