Mikoła Statkievič pravioŭ šmatludnuju sustreču z vybarcami ŭ Minsku VIDEA

Siońnia były palitviazień Mikoła Statkievič a 18-aj hadzinie zładziŭ sustreču vybarcaŭ na płoščy Svabody.

Pavialičyć

Eks-kandydat u prezidenty zaprašaŭ na sustreču i Alaksandra Łukašenku, papiarednie pieraličyŭšy piać vostrych pytańniaŭ, adkazy na jakija biełarusy chacieli b atrymać ad kiraŭnika dziaržavy.

Ale Łukašenka pradkazalna nie pryjechaŭ i, jak tolki zvany na Ratušy pačali bić šostuju hadzinu, Mikoła Statkievič sam raspačaŭ zvarot da ludziej ź miehafonam u rukach.

Pry hetym prahučała zdahadka, što Łukašenka nie pryjechaŭ, bo baicca ludziej, jakija mohuć nie tolki zadać jamu niazručnyja pytańni ŭ tvar, ale «i štości z hetym tvaram zrabić».

Potym były palitviazień pytaŭsia ŭ ludziej, ci maje prava być prezidentam čałaviek, jaki dbaje pra ŭłasnuju ŭładu, a nie pra los krainy? Ci moža być prezidentam čałaviek, jaki pieraŭtvaraje biełarusaŭ u «ruskich sa znakam jakaści»? Ludzi hurtam adkazvali «Nie», a potym pačali skandavać «Žyvie Biełaruś».

Nieŭzabavie Statkievič pieradaŭ słova Uładzimiru Niaklajevu i Anatolu Labiedźku, jakija zrabili akcenty na vybarčym farsie, represijach i niedapuščeńni prysutnaści rasijskich vojskaŭ u Biełarusi.

Dzieści praz 30 chvilin ad pačatku akcyi placoŭka pierad Ratušaj całkam zapoŭniłasia. Jak potym kazali ludzi z zadnich šerahaŭ, im navat było kiepska čuvać pramoŭcaŭ. Na schod sabrałasia kala 400—500 čałaviek. Bolš šmatludnych schodaŭ u časie hetaj vybarčaj kampanii navat ni adzin z kandydataŭ nie źbiraŭ.

Łunała niekalki bieła-čyrvona-biełych ściahoŭ, paru ściahoŭ AHP i Jeŭrasajuza.

Z ulikam taho, što troje śpikieraŭ vystupali pa čarzie, u čas pramovy adnaho da druhoha padychodziŭ milicyjant i składaŭ pratakoł za niezakonnaje praviadzieńnie pikieta. Spačatku aficer skłaŭ pratakoł na Statkieviča, ale toj admoviŭsia jaho padpisvać, arhumientavaŭšy, što ničoha nie parušaje. A kali milicyjant padyšoŭ da Uładzimira Niaklajeva, to narod choram pačaŭ kryčać «Hańba» u bok milicyi, jakaja «nie pavažała narod, jaki sabraŭsia pasłuchać palitykaŭ».

Było vidać, jak chvalujecca milicyjant, jakoha adpravili składać pratakoły — padčas zapaŭnieńnia ŭ jaho mocna tresłasia ruka.

Akcyja ž skončyłasia tym, što palityki zaklikali ŭsich prysutnych na nastupnyja schody — 4 i 10 kastryčnika. Anatol Labiedźka da taho ž paprasiŭ ludziej prychodzić nastupny raz z tryma siabrami.

U bolšaści pryjšli ludzi siaredniaha i stałaha vieku, moładzi było nie šmat. Tym nie mienš, akcyja kala Ratušy — najbujniejšaja i samaja masavaja za leta i vosień.

• 0
• 0
• 0
• 0
• 0
• 0
• 0
• 0