Тэлесэзон у Амэрыцы
Увосень ва ўсім сьвеце пачынаецца новы тэлесэзон. Заканадаўцам моды ў шоў-індустрыі і найбуйнейшым вытворцам адпаведнага матэрыялу застаецца Амэрыка. Лета лічыцца там сэзонам баевікоў – славутыя студыі дазваляюць сабе выпуск неабцяжараных мастацкімі высілкамі карцінаў. І ў гэтым сэзоне гледачам падрыхтаваныя выбухі на ўвесь экран, хлопцы са зброяй незвычайнай велічыні й магутнасьці ды – у якасьці адбітку расейскіх катастроф – дэфэктныя падводныя лодкі. Але нават паводле галівудзкіх стандартаў сёлетні сэзон перанасычаны фільмамі, створанымі ў працяг вядомых гітоў (“Людзі ў чорным-2”) ці пераробкамі славутых мультфільмаў ды коміксаў (як “Скубі-ду” ці “Чалавек-павук”).
Апошнім часам папулярныя кінааўтары выяўляюць жаданьне супрацоўнічаць з тэлестудыямі – 13 сэрыяў даюць большыя магчымасьці для самарэалізацыі, чым дзьвюхгадзінны кінафільм. У выніку на амэрыканскім экране ў гэтым сэзоне будзе болей мастацкасьці й глыбокага псыхалягізму. Тэлеканалы абяцаюць шэраг новых сэрыялаў, сярод якіх “Сапраны” (пра падвойнае жыцьцё боса мафіі) ці “24”. Кожны эпізод апошняга сэрыялу прысьвячаецца адной гадзіне з жыцьця супрацоўнікаў антытэрарыстычнага аддзелу ЦРУ ў Лос-Анджэласе, якія выкрываюць змову супраць кандыдата на пасаду прэзыдэнта. У сэрыяле выкарыстоўваецца “падзелены экран” – каб адначасова паказваць розныя лініі сюжэту. А сэрыял “Шэсьць футаў у глыбіню”, зьняты ў стылі “чорнай камэдыі”, распавядае пра жыцьцё сям’і, якая трымае пахавальны салён. Не шкадуючы глядацкіх нэрваў, камэра паказвае працэс апрацоўкі мерцьвякоў перад пахаваньнем і драматычныя канфлікты паміж сямейнікамі. У жанры ток-шоў сэнсацыяй сэзону магла б стацца новая штодзённая перадача зь Білам Клінтанам у якасьці вядучага, пра што зь ім вялі перамовы аж два каналы амэрыканскай тэлевізіі. Урэшце Клінтан адмовіўся, бо дужа цяпер заняты дабрачыннасьцю. Але спадзеў на будучыню пакінуў.
Міхал Чарвінскі
Цяпер чытаюць
Вызвалены палітвязень Мікіта Емяльянаў — у свае 26 гадоў даведзены да вельмі цяжкага стану здароўя1
Вызвалены палітвязень Мікіта Емяльянаў — у свае 26 гадоў даведзены да вельмі цяжкага стану здароўя
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары