Сербія, нягледзячы на сяброўства з Расіяй, з лістапада спыніць купляць расійскую нафту
Сербія, якая мае цесныя сувязі з Расіяй і імкнецца не сварыцца з ёй нават пасля 24 лютага, з лістапада спыніць пастаўкі расійскай нафты. Пра гэта сказаў прэзідэнт Сербіі Аляксандр Вучыч, паведамляе сербскае выданне Telegraf.
У сваім звароце да сербскага народа ён згадаў пра магчымае скасаванне ў Белградзе Еўрапрайда (мерапрыемства, якое праводзіць ЛГБТ), назваўшы гэтую тэму «глупствам»:
«Мы проста абмяркоўваем ўсялякія глупствы, каб не казаць пра тое, што мы будзем рабіць з электраэнергіяй, што мы будзем рабіць з нафтай, бо пасля лістапада расійскай нафты для нас не будзе праз санкцыі. Замест таго, каб гаварыць пра газ, пра мазуту, пра вугаль, мы гаворым пра розныя глупствы», — сказаў Вучыч.
З 1 лістапада Белград праз санкцыі ЕЗ на пастаўкі энергарэсурсаў з Расіі не зможа атрымліваць расійскую нафту. Яе дастаўляюць у краіну танкерамі па Адрыятычным моры, а затым па нафтаправодзе праз Харватыю.
Вучыч яшчэ ў канцы чэрвеня заяўляў, што расійская эканоміка з-за санкцый Захаду супраць Расіі вымушаная шукаць альтэрнатыву і скардзіўся, што з-за нафтавага эмбарга Сербія будзе губляць 600 мільёнаў даляраў у год.
3 чэрвеня Савет Еўрасаюза зацвердзіў шосты пакет санкцый супраць Расіі, які прадугледжвае значнае скарачэнне імпарту расійскай нафты.
Цяпер чытаюць
У Еўрасаюзе 550 тысяч беларусаў з дазволамі на жыхарства4
Каментары