Малдова адмовілася выдаць Беларусі затрыманага ў ёй украінскага дэпутата
Генпракуратура Малдовы адмовілася экстрадаваць у Беларусь дэпутата Вярхоўнай рады Украіны Яўгена Якавенку, якога затрымалі на малдаўскай мяжы 5 чэрвеня. Пра гэта 7 чэрвеня паведаміла прэс-служба пракуратуры Малдовы, піша Радыё Свабода.
«Прычыны адмовы ў экстрадыцыі абумоўленыя статусам гэтай асобы як члена Вярхоўнай рады Украіны, які перамог на выбарах у 2019 годзе ў Данецкім рэгіёне, у кантэксце геапалітычнай сітуацыі ў рэгіёне», — адзначылі ў пракуратуры.
Малдаўская пракуратура падазрае, што калі Якавенку экстрадуюць у Беларусь, працэс супраць яго не будзе справядлівым. Таму яна распарадзілася адпусціць украінскага дэпутата.
Якавенка знаходзіцца ў міжнародным вышуку на запыт Беларусі. У Беларусі ўкраінскага дэпутата падазраюць у хабарніцтве і карупцыі.
У 2001 годзе Яўген Якавенка заснаваў гандлёва-прамысловую кампанію «Алькон». Вядома, што кампанія Якавенкі была пасярэдніцай у пастаўках сельскагаспадарчай прадукцыі, паліва, металаў і ўгнаенняў, а таксама займалася гандлем грузавым аўтамабільным транспартам. Па сутнасці, ягоная дзейнасць магла быць звязаная і з прасоўваннем беларускай прадукцыі на ўкраінскім рынку.
Сярод рэзідэнтаў свабодных эканамічных зон Беларусі, абнародаваных на адпаведных сайтах, імя Яўгена Якавенкі і назва ягонай кампаніі не згадваюцца. Але з відаў дзейнасці кампаніі, якую бізнэсмен пасля выбрання ў парламент перапісаў на жонку Таццяну, вынікае, што ў сферу ягоных інтарэсаў маглі трапіць беларускія нафтапрадукты, угнаенні і грузавыя аўтамабілі.
Каментары