«Ходзяць чуткі пра крэдыт». Што вядома пра самаспаленне мужчыны ў Ашмянскім раёне?
14 чэрвеня здарылася бяда ў вёсцы Гарэцкаўшчына Ашмянскага раёна. 53-гадовы мясцовы жыхар Іван В. падпаліў сябе. Мужчына выжыў, але знаходзіцца ў цяжкім стане.
Што стала прычынай такога ўчынку, дакладна невядома. Па вёсцы ходзяць чуткі, што ў мужчыны былі праблемы з нейкім крэдытам, ён моцна хваляваўся на гэтую тэму апошнім часам. Але мясцовыя прызнаюць: гэта ўсяго толькі версія.
«Кажуць, знайшлі яго каля медпункта, сядзеў там. Чаму так зрабіў — хто ведае?» — паціскае плячыма мясцовая жыхарка.
Прычым фельчарскі пункт у Гарэцкаўшчыне працуе праз дзень. Калі Іван рашыўся на свой учынак, ФАП быў якраз закрыты, медыка ў вёсцы не было.
Івану В. 53 гады. Ён інвалід трэцяй групы — на адной руцэ няма некалькіх пальцаў. Жыве на пенсію па інваліднасці, часам сям-там падпрацоўваў. Жылі ўтраіх у адным доме — Іван, яго старэйшы 55-гадовы брат, іх старая маці. Абодва браты нежанатыя.
Але ж, кажуць аднавяскоўцы, браты жылі спакойна, п’яніцамі іх не назваць.
«Не святыя, канечне. Але і праблем ніколі не было», — кажуць у вёсцы.
Тое ж кажуць і ў сельсавеце: Іван не алкаголік, у дэбошах заўважаны не быў, на ўліках не стаіць.
Пасля свайго ўчынку Іван В. выжыў. Цяпер ён у Ашмянах — у рэанімацыі.
Цяпер чытаюць
«Жэня пагадзіўся на будоўлю, а не ваяваць. І толькі калі выйдзе з запою!»: як прадалі ў расійскую армію жыхара Лёзна. Ахвяра не адна5
Каментары