У Мінску п'яны кіроўца на сагнанай Volvo разбіў прынамсі восем аўтамабіляў. Пра гэта AUTO.TUT.BY паведамілі супрацоўнікі Аб'яднанай дарожна-аварыйнай службы. Інфармацыю пацвердзілі ў ДАІ Маскоўскага раёна.
Інцыдэнт адбыўся ўначы 10 мая. Каля 03.00 у міліцыю паступіла паведамленне аб тым, што паміж дамамі 102 і 104 па вуліцы Грушаўскай п'яны кіроўца на Volvo XC90 разбіў два аўтамабілі.
На месцы аварыі інспектары выявілі, што Volvo ехаў па вуліцы Грушаўскай, пасля чаго на пешаходным пераходзе вылецеў за межы праезнай часткі і ўрэзаўся ў грузавік, які ад удару адкінула ў Toyota.
«Кіроўца Volvo ледзь трымаўся на нагах. Інспектары адвезлі яго на медыцынскі агляд, які паказаў 3,06 праміле алкаголю», — распавяла прадстаўніца ДАІ Маскоўскага раёна Любоў Трапашка.
Паводле слоў кіроўцы, вечарам ён выйшаў з хаты, купіў у краме бутэльку піва, пасля чаго выклікаў таксі і далей нічога не памятае. Таксама мужчына паспрабаваў заблытаць інспектараў, некалькі разоў не назваўшы свае даныя, аднак яго асобу аператыўна высветілі. Кіроўцам аказаўся 29-гадовы мужчына. Пасведчання кіроўцы ён ніколі не атрымліваў.
На гэтым гісторыя не скончылася. Супрацоўнікі ДАІ ўбачылі, што ў Volvo прабіты паддон. Яны вырашылі праехаць па маршруце «мокрага следу». У ходзе гэтай паездкі інспектары высветлілі, што гэтая Volvo разбіла яшчэ як мінімум 5 аўтамабіляў: на праспекце Дзяржынскага і яшчэ ў адным з двароў па вуліцы Грушаўскай.
Таксама міліцыянты знайшлі ўладальніка Volvo. Той распавёў супрацоўнікам ДАІ, што аўтамабіль нікому не даваў. Па словах мужчыны, паўгода таму абакралі яго дом. Сярод зніклых рэчаў быў і дублікат ключоў ад гэтага самага Volvo. Магчыма, ім і скарыстаўся зламыснік.
Па факце здарэння праводзіцца праверка, высвятляюцца іншыя абставіны. У Дзяржаўтаінспекцыі не выключылі, што паведамленні пра іншыя ДТЗ, якія ўчыніў кіроўца Volvo, будуць яшчэ паступаць у міліцыю.
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося4
Каментары