Мінгарвыканкам не дазволіў правесці Чарнобыльскі шлях у Курапаты

Мінгарвыканкам дазволіў правядзенне 26 красавіка акцыі «Чарнобыльскт шлях», але змяніў фармат акцыі.

Раней заяўнікі прасілі дазволі на правядзенне акцыі па маршруце: кінатэатр «Кастрычнік» (ст. метро «Акадэмія навук») — вул. Хмяльніцкага — Я. Коласа — Лагойскі тракт — урочышча Курапаты з 12:00 да 15:00.

Гарвыканкам дазволіў правядзенне «Чарнобыльскага шляху» ў звыклым апошнім часам фармаце: збор удзельнікаў з 16.00 да 16.30 каля кінатэатра «Кастрычнік», шэсце па праспекце Незалежнасці і вуліцы Сурганава да парку Дружбы Народаў, правядзенне ў парку мітынгу з 17.30 да 18.30.

Да таго ж першапачатковы заяўнік на арганізацыю «Чарнобыльскага шляху» Ілля Дабратвор паведаміў, што яго выключылі са спісу арганізатараў. Дабратвор патлумачыў сваё выключэнне з ліку заяўнікаў наступным чынам:

«У Мінгарвыканкаме спаслаліся на тое, што 24.03.2014 быў прыцягнуты да адміністрацыйнай адказнасці. Аднак я хачу заявіць, што ў гэты дзень я святкаваў дзень нараджэння, і нават не ведаю, ці трэба падаваць заяву аб масавым мерапрыемстве на святкаванне ўласнага дня нараджэння».

Па словах кіраўніка Партыі БНФ Аляксея Янукевіча, адмова ў правядзенні акцыі ў заяўленым фармаце (шэсце да Курапатаў) у гарвыканкаме патлумачылі тым, што па абраным маршруце знаходзяцца адміністратыўныя будынкі, правядзенне масавых акцый каля якіх забаронена законам. Рашэнне Мінгарвыканкама прынята з улікам пазіцыі Мінскага райвыканкама. Таксама Янукевіч патлумачыў, што Мінгарвыканкам не дазволіў правесці мерапрыемства раней, бо ў Парку дружбы народаў на ранейшы час запланавана афіцыйнае мерапрыемства.

«Таксама чыноўнікі паведамілі, што пасля правядзення шэсця на Дзень волі ад мінчукоў паступілі скаргі на выкарыстанне партрэтаў украінцаў, да якіх у грамадстве існуе неадназначнае стаўленне,

і папрасілі арганізатарам «Чарнобыльскага шляху» і будучым арганізатарам мітынгаў на Дзень волі прыняць тое да ведама. Аднак нас цешыць, што выкарыстанне партрэтаў такіх беларусаў як Вітушка і Булак-Балаховіча не выклікала пратэсту. Відаць, у беларускім грамадстве наконт гэтых герояў існуе кансэнсус і згода, і я лічу што ўжо гэта ёсць някепскім вынікам», — сказаў ён.

Фінальнай кропкай шэсця, паводле арганізатараў, мусіць стаць чарнобыльская капліца, куды пасля заканчэння мітынгў ў індывідуальным парадку ўсіх жадаючых запросяць арганізатары.

Аляксей Янукевіч і прэс-сакратар БХД Дзяніс Садоўскі выказалі пратэст супраць змянення першапачаткова заяўленага маршрута шэсця.

«Аднак «Чарнобыльскі шлях» перш за ўсё акцыя памяці, «Чарнобыльскі шлях» не месца для сутычак з АМАП — для гэтага ёсць іншыя мерапрыемствы, падчас якіх трэба праявіць жорстую пазіцыю. У звязку з гэтым мы пагадзідліся на ўмовы Мінгарвыканкама», — дадаў Садоўскі.

Таццяна Новікава з арганізацыі «Экадом» паведаміла, што ад сябе падала заяўку на правядзенне мітынгу «За бяз'ядзерны свет» 26 красавіка ў Парку дружбы народаў з 18:00 да 20:00, каб першы мітынг «плаўна перацёк у другі».

«Акрамя мітынгу мы арганізуем дыскусію «Экалагічныя наступствы ядзерных катастроф», якая адбудзецца ў галерэі «Ў» 22 красавіка з 18:30 да 21:00.

У дыскусіі возме ўдзел вядомы брытанскі даследчык Крыс Басбі і Юрый Варонежцаў — беларускі навукоўца, былы адказны сакратар дзяржаўнай камісіі Вярхоўнага савета СССР па расследаванні прычын катастрофы на Чарнобыльскай АЭС», — сказала Новікава.

Галоўным ідэалагічным пасланнем гэтага года на «Чарнобыльскім шляху», які неаднаразова падкрэслілі ўсе арганізатары акцыі, стане пратэст супраць расійскай ядзернай экспансіі ў Беларусь: як у выглядзе будаўніцтва АЭС у Астраўцы, што праходзіць па «эксперыментальным» праекце і з шматлікімі парушэннямі, так і ў выглядзе магчымага размяшчэння тактычнай ядзернай зброі на расійскіх знішчальніках, дыслакаваных на беларускіх авіябазах.

• 0
• 0
• 0
• 0
• 0
• 0
• 0
• 0