Белорусскоязычная новогодняя сказка в Минске собрала аншлаг
30 снежня ў Маладзёжным тэатры эстрады прайшла прэм’ера казачнага спектакля «Як літара Ў уратавала Каляды». Гэта новы дзіцячы музычна-тэатральны праект музыкі і прадзюсара Рамана Арлова, вядомага па гуртах «J:МОРС», «У нескладовае», мюзікле «Чарадзей».
Але адным спектаклем справа не абмяжоўваецца.
Кожнага гледача, а іх у гэты перадапошні дзень 2017 года ў Тэатр эстрады прыйшло шмат — поўная зала сабралася — на ўваходзе чакаў салодкі падарунак. А ў холе дзяўчаты і хлопцы з фальклорнага калектыву спявалі калядныя песні, вучылі дзетак танчыць беларускія танцы. Часам не маглі стрымацца і пачыналі танчыць нават бацькі. Усё мерапрыемства, кажа арганізатар імпрэзы Віталь Супрановіч, скіраванае на тое, каб «акунуць дзяцей у атмасферу сапраўдных калядных цудаў, пазнаёміць іх з беларускай міфалогіяй у цікавай і пазнавальнай форме».
І, здаецца, задумка ў Рамана Арлова атрымліваецца, Прынамсі, у Віктара, які прывёў на спектакль «Як літара Ў уратавала Каляды» дачку Адэльку, уражанні выключна пазітыўныя.
«Даўно заўважыў, што перад Новым годам у нас адбываецца вельмі шмат падобных мерапрыемстваў для дзяцей, але пераважна — на рускай мове. Але калі рабіць свята дзецям, то лепш ужо весці на спектакль на роднай мове. Тым больш, які знаёміць з нашымі айчыннымі культурнымі традыцыямі і звычаямі. А самае галоўнае — дзеці ў захапленні ад убачанага. Праўда, Адэлька?» — кажа Віктар, звяртаючыся да дачкі, дзяўчынкі гадоў пяці.
«Мне вельмі спадабалася!» — адказвае Адэля, ледзь не падскокваючы на месцы.
«А калі ўсё скончылася, мы нават расплакаліся — так хацелі, каб казка яшчэ працягвалася», — выдае сакрэт дачкі тата.
Сустракаю ў фае шмат знаёмых. Сярод іх Мілану Міхалевіч з дачкой Алёнай-Дамінікай.
«Мне вельмі спадабалася! — кажа дзяўчынка. — Асабліва, як Яська і Янінка мужна блукалі па чароўным калядным бары і ратавалі літары».
«Дзеці ўважліва сачылі за тым, што адбываецца на сцэне, ад пачатку і да самага канца, спявалі разам з акцёрамі, удзельнічалі ў гульнях. Для мяне гэта — галоўны паказчык таго, ці ўдала атрымалася задума ў аўтараў», — кажа Мілана Міхалевіч.
Пра што ж спектакль? Старажытныя духі беларускага сусвету паўкрыўдзіліся, што дзеці іх забыліся і вырашаюць іх правучыць: спыняюць час і замарожваюць усе літары са слова «надышоў». А значыць Новы год і Каляды ніколі не прыйдуць! Але Яська і Янінка яшчэ могуць выправіць сітуацыю. Іх чакаюць прыгоды і выпрабаванні ў чароўным калядным бары, падчас якіх яны мусяць сабраць чароўныя літары і скласці з іх чароўнае слова: «надышоў». А Зюзя, Ляля, Жыжаль, Мара ды іншыя духі беларускага космасу дзецям дапамогуць.
А што там з літарай «Ў», якая нібыта ўратавала Каляды? Пра гэта можна будзе даведацца 4 студзеня, калі завітаеце ў Тэатр эстрады.
Быў на спектаклі вядомы беларускі пісьменнік Уладзімір Арлоў. Цікаўлюся, ці спадабалася яму тое, што зрабіў яго сын Раман Арлоў.
«Нават мне захацелася разам з дзеткамі-гледачамі сфатаграфавацца ў чароўным бары па заканчэнні спектакля, — смяецца аўтар «Айчыны». —
Мне падчас прагляду ўзгадаўся Полацк часоў майго дзяцінства. Ялінка на пляцы горада, куды мяне везлі на санках… Вось толькі спектакляў такіх тады не было, і на літару «Ў» надзейна забыліся ўжо ў той час дзеці, бо адны толькі расійскія школы былі ў Полацку ў маім дзяцінстве. А цяпер я веру — знойдуць нашы дзеці літару «Ў»!»
-
Стало известно, когда прекратит работу Национальный центр современного искусства
-
Паспорта, договоры, фото. Что из архива Рады БНР передали «Скарынаўскай бібліятэцы» в Лондоне
-
Работы художника из Новополоцка не взяли на выставку Art Minsk. Он пришел на открытие в костюме клоуна и стал главной звездой
Сейчас читают
Помните Даниила из Офиса Тихановской, которому за два дня собрали деньги на онкологическую операцию? Ему написал тот самый одноклассник, который его ударил — с чего все и началось44
Комментарии