Vybityja dźviery, maski-šou, zatrymańnie top-mieniedžaraŭ. Pačaŭsia pahrom «Jeŭraopta»
Jak stała viadoma «Našaj Nivie», siońnia, 15 maja, byŭ zatrymany šerah top-mieniedžaraŭ «Jeŭrahandlu» — jurydyčnaj asoby, jakaja vałodaje sietkaj kramaŭ «Jeŭraopt». Heta samaje vialikaje pryvatnaje pradpryjemstva ŭ krainie. Pryčyna pretenzij dziaržavy pakul nieviadomaja.
Jak paviedamili «Našaj Nivie» znajomyja sa śviedkami historyi, siońnia ŭ centralnym minskim ofisie «Jeŭrahandlu» adbyłosia maski-šou z vyłamvańniem dźviarej. Mierkavana, z vobšukam prychodziŭ Departamient finansavych rasśledavańniaŭ.
Top-mieniedžaraŭ, jakija znachodzilisia ŭ pamiaškańni, zatrymali. Piersanał na drabniejšych pazicyjach pakinuli na svabodzie.
Pavodle infarmacyi na sajcie «Jeŭraopta», u sietku ŭvachodziać 1139 kram. U kampanii na kaniec 2024 hoda pracavała amal 32 tysiačy čałaviek.
Viadoma, što asnoŭnyja bienieficyjary kampanii — Siarhiej Litvin i Uładzimir Vasilko — doŭhi čas žyvuć za miažoj, dzie apynulisia padčas papiaredniahu najezdu na «Jeŭraopt» u pačatku 2000-ch.
Biełaruski biznes jany kantralujuć praź jeŭrapiejskija jurydyčnyja asoby.
Pry hetym staršynioj dyrektarskaj rady «Jeŭrahandlu» ŭ Minsku źjaŭlajecca Alaksandr Litvin, rodny brat Siarhieja. Ci na svabodzie jon — nieviadoma.
Vizit ludziej u pahonach adbyŭsia na fonie kryzisu z harodninaj: praz palityku Łukašenki pa strymlivańni cen pastaŭščykam stała niavyhadna adhružać pradukcyju ŭ ajčynnyja kramy, tamu što heta nierentabielna.
Letašnija ŭradžai pradadzienyja ŭ Rasiju pa rynkavych cenach, a ŭ biełaruskija kramy pastupaje pradukcyja z zapasaŭ — nie zaŭsiody likvidnaja, časam padpsavanaja abo prosta nieprydatnaja da ŭžyvańnia.
Najbolš jaskrava heta bačna na prykładzie bulby, pieraboi ź jakoj šyroka abmiarkoŭvajucca ŭ hramadstvie. Taje samaje zdaryłasia z kapustaj i cybulaj.
Ciapier čytajuć
Aryštavany viadomy nieŭrołah Rusłan Badamšyn. Jon byŭ na chatniaj chimii12
Kamientary