Ukraincy, jakija biahuć ad mabilizacyi, płaciać tysiačy dalaraŭ, kab pierasiekčy miažu ź Biełaruśsiu
Ukrainskija sudy razhladajuć niekalki administracyjnych i kryminalnych spraŭ, jakija datyčacca niezakonnaha pierasiačeńnia miažy ź Biełaruśsiu, piša Radyjo Svaboda.
Adzin z rajonnych sudoŭ Rovienskaj vobłaści ŭ kancy vieraśnia aštrafavaŭ dvuch hramadzian Ukrainy na maksimalna praduhledžanuju za niezakonnaje pierasiačeńnie miažy sumu — 8500 hryŭniaŭ (pryblizna 200 dalaraŭ u ekvivalencie. — RS).
Jak adznačajecca ŭ rašeńni suda, jaki ŭ svaim rasparadžeńni maje Radyjo Svaboda, ukraincaŭ zatrymali sioleta 20 vieraśnia na terytoryi Sarnienskaha rajona Rovienskaj vobłaści, za 10 kiłamietraŭ ad ukrainskaj miažy ŭ kirunku biełaruskaj vioski Buchličy Stolinskaha rajona Bresckaj vobłaści.
Pry składańni pratakoła adzin z zatrymanych paviedamiŭ ukrainskim pamiežnikam, što mieŭ namier «pierasiačy dziaržaŭnuju miažu ź Biełaruśsiu dla dalejšaha pierajezdu ŭ krainy ES z metaj paźbiehnuć mabilizacyi».
Jašče adnu spravu, ale ŭžo kryminalnuju, rasśleduje palicyja Rovienskaj vobłaści, jakaja vyjšła na arhanizataraŭ niezakonnaha pierapraŭleńnia ŭkraincaŭ u Biełaruś. Zhodna z materyjałami spravy, hetym zajmalisia try čałavieki, jakija za svaju dapamohu patencyjnym pryzyŭnikam patrabavali ad 600 dalaraŭ da 9 tysiač dalaraŭ.
Achvotnych paźbiehnuć mabilizacyi jany pieravozili z horada Sarny Rovienskaj vobłaści ŭ inšyja nasielenyja punkty Sarnienskaha rajona bližej da miažy, i na kožnym etapie kožny z arhanizataraŭ atrymlivaŭ svoj «hanarar». Tyja, chto padvoziŭ niepasredna da miažy, atrymlivali najbolš — 9 tysiač dalaraŭ.
Dla pieramiaščeńnia achvočych pakinuć Ukrainu vykarystoŭvali matacykł i aŭtamabili, adzin ź jakich mieŭ zamiežnuju rehistracyju.
Sarnienski rajon miažuje z Bresckaj vobłaściu Biełarusi, pamiežnaja terytoryja prachodzić praz bałocistuju miascovaść.
Spravu rasśledujuć ź siaredziny žniŭnia 2024 hoda. Dva fihuranty znachodziacca ŭ śledčym izalatary, jašče adzin — pad chatnim aryštam.
Raniej padobnuju spravu pačali rasśledavać u Čarnihaŭskaj vobłaści.
Vaskrasienski: Adkryvajecca nieba — i Aleś Bialacki adrazu vychodzić13
Kamientary