Kola Łukašenka syhraŭ na rajali na «Dni narodnaha adzinstva». Jaho tata pierad hetym pryhraziŭ Treciaj suśvietnaj vajnoj
Małodšy syn Alaksandra Łukašenki syhraŭ partyju na rajali pierad sabranymi na «Minsk-Arenie» z nahody «Dnia narodnaha adzinstva» prychilnikami ŭłady.
Vystupleńnie Koli Łukašenki praciahvałasia 6 chvilin i było zajaŭlena ŭ ramkach prahramy «Słavianskaje suzorje», padrychtavanaj vykładčycaj kafiedry śpiecyjalnaha fartepijana Biełaruskaj dziaržaŭnaj akademii muzyki Alenaj Astaškinaj-Myśliŭčyk.
Sama Alena Astaškina-Myśliŭčyk, uradženka ŭkrainskaha Zakarpaćcia, ihrała na druhim rajali. Akampaniravaŭ im Prezidencki arkiestr.
Pafasnamu kancertu papiaredničała doŭhaja pramova Alaksandra Łukašenki, u jakoj jon strašyŭ biełaruski narod i krainy Zachadu Treciaj suśvietnaj vajnoj.
Asobna Alaksandr Łukašenka zaściaroh Ukrainu ad źbićcia rasijskich šachiedaŭ nad terytoryjaj Biełarusi. I patłumačyŭ, čamu ŭ Biełarusi maŭčać, što jany lotajuć praź jaje tudy-siudy.
«Pavinien vam adkryta zajavić: my damovilisia pa kanałach z ukraincami, što my nie budziem u ŚMI padśviatlać fakty zalotu bieśpiłotnikaŭ, i rasiejskich i ŭkrainskich, na našu terytoryju», — zajaviŭ Łukašenka.
Pry hetym jon abvinavaciŭ ZŠA ŭ tym, što jany zahadali Kijevu, kali składucca abstaviny, atakavać našu infrastrukturu pa paŭdniovaj miažy.
«Ja chaču spytać u amierykancaŭ: vy miru chočacie, mirnych pieramovaŭ ci eskałacyi situacyi? Ja niezdarma heta pytajusia. Tamu što jany apošnim časam vielmi časta namiakali pra pieramovy. I navat vysunuli ŭmovu. My pahadzilisia. A jak tady heta razumieć?»
«My viedajem pra ŭsie ich zadumy, i ničoha ŭ ich nie atrymajecca», — zajaviŭ Łukašenka.
Na dumku Łukašenki, jahony hałoŭny sajuźnik, pucinskaja Rasija, zdoleje adkinuć ukrainskija vojski z Kurskaj vobłaści.
«Chaču papiaredzić našych praciŭnikaŭ, našych supiernikaŭ. I tych, chto nie razumieje jašče. Nie treba heta rabić. Napad na Biełaruś — heta Treciaja suśvietnaja vajna», — zajaviŭ Łukašenka.
A kab chto raptam nie padumaŭ, što heta prosta słovy, jon jašče padmacavaŭ svaju hroznuju rytoryku:
«Ja ŭžo kazaŭ: biełaruskuju miralubnaść nie varta razumieć i prymać za słabaść. Kali ja kažu pra heta, vy nie padumajcie, što ja blefuju abo zhuščaju farby. Nie. Jak nikoli raniej nam jość čym adkazać».
Kamientary