Na dziaržTB raskazali, u čym vinavaciać zatrymanaha japonca, jaki vykładaŭ va ŭniviersitecie ŭ Homieli
Masatosi Nikanisi pražyŭ u Biełarusi 6 hadoŭ. Jaho zatrymali letam 2024-ha — ciapier jon u SIZA KDB. Na BT vypuścili siužet, dzie raskazali, u čym vinavaciać japonca.
Jak raskazvajuć u siužecie BT, u 2008-m Masatosi pačaŭ padarožničać pa krainach Uschodniaj Jeŭropy, jakija ŭvachodziać u kitajskuju inicyjatyvu «Adzin pojas — adzin šlach». Rabiŭ jon heta, śćviardžajecca, z metaj raźviedki.
U 2016-m jon va ŭkrainskim Kupiansku pryniaŭ pravasłaŭje. U Homiel pierajechaŭ u 2018-m.
Jon ažaniŭsia ź biełaruskaj, paśla raźvioŭsia, vykładaŭ u Homielskim dziaržaŭnym univiersitecie imia Francyska Skaryny (sam Masatosi juryst pa adukacyi). Adkryŭ u Biełarusi firmu «BiełNichanInternešnł». Ale ŭsio heta, pa viersii ŭładaŭ, dla prykryćcia. Bo firma za čas dziejnaści nie zaklučyła nijakich ździełak i nie mieła prybytku, a žyŭ Masatosi na hrošy, jakija štomiesiac zdymaŭ ź japonskaha rachunku — 1500—2000 rubloŭ.
Nikanisi, śćviardžajecca ŭ siužecie, mieŭ kuratara i pastajanna jamu davaŭ spravazdaču, nieadnarazova pozna ŭviečary sustrakaŭsia z supracoŭnikam pasolstva. Asabliva paśla pačatku vajny ŭ 2022-m — jaho kuratara cikaviła, ci pracujuć sankcyi, ci zatrymlivajuć na vulicach za foty stratehičnych abjektaŭ, što z cenami, rasijskimi vajskoŭcami i ŭzbrajeńniem.
Z Homiela jon časta jeździŭ u nasielenyja punkty kala ŭkrainskaj miažy i fatahrafavaŭ tam. Zdymaŭ transpart, darohi, masty, čyhunku, vakzały, aeraport. Zrabiŭ bolš za 9 tysiač fota ź biełaruska-ŭkrainskaha pamiežža, śćviardžaje prapahanda. U siužecie pakazali kadry ź japoncam, źniatyja schavanaj kamieraj.
Spravazdačy z Homiela ŭ Tokia Masatosi adpraŭlaŭ pad psieŭdanimam «Masa».
Taksama, śćviardžajuć na BT, jon jeździŭ u Paleski radyjacyjna-ekałahičny zapaviednik, źviazvaŭsia ź biełaruskimi pradpryjemstvami, kab raźviedać ekanamičnuju infarmacyju.
Zatrymali japonca ŭ lipieni 2024 pierad vyletam ź Biełarusi. Ciapier jon u SIZA KDB. Abvinavačańnie vystavili pa artykule 358-1 KK — ahienturnaja dziejnaść.
«Znachodziačysia na terytoryi našaj krainy, ažyćciaŭlaŭ zbor i pieradaču na adras japonskaj śpiecsłužby raźviedvalnaj infarmacyi vajskovaha charaktaru. U pryvatnaści, ab biełaruskaj vajennaj infrastruktury, ab pieramiaščeńni vojskaŭ i vajskovaj techniki, ab biahučaj situacyi na paŭdniovym napramku i inšaje. Akramia taho, zamiežniku raźviedorhanam adpracoŭvalisia zadańni pa viarbovačnym vyvučeńni biełaruskich hramadzian, jakija majuć dostup da dziaržaŭnych sakretaŭ», — ahučyŭ abvinavačańnie načalnik śledčaha ŭpraŭleńnia KDB Kanstancin Byčak.
Kamientary